अंतरराष्ट्रीय, लोकशाही न्यूज नेटवर्क:
जगभरात थैमान घालणाऱ्या जीवघेण्या कोरोना व्हायरसवर स्पुटनिक व्ही ही रशियन लस बनवणाऱ्या वैज्ञानिकांच्या चमुतील एका वैज्ञानिकाची बेल्टने गळा आवळून हत्या करण्यात आली आहे. आंद्रे बोटीकोव्ह असं या वैज्ञानिकाचे नाव आहे. याप्रकरणी २९ वर्षीय व्यक्तीला अटक करण्यात आली असून घरगुती वादातून ही हत्या झाल्याची यावेळी माहिती पोलिसांनी दिली आहे.
याबाबत रशियन मीडियाने दिलेल्या वृत्तानुसार, ४७ वर्षीय आंद्रे बोटीकोव्ह हे गमलेया नॅशनल रिसर्च सेंटर फॉर इकोलॉजी अॅण्ड मॅथेमॅटिक्स येथे वरिष्ठ संशोधक म्हणून काम करत होते. गुरुवारी ते त्यांच्या मॉस्को येथील घरात आराम करत असताना संशयीत आरोपी तिथे आला. यावेळी काही घरगुती कारणांवरुन दोघांमध्ये वाद झाला. वाद विकोपाला गेल्यानंतर आरोपीने रागाच्या भरात आंद्रे बोटीकोव्ह यांची बेल्टने गळा आवळून हत्या केली.
रशियाचे अध्यक्ष व्लादिमीर पुतीन यांनी २०२१ मध्ये त्यांचा सत्कारही केला होता. करोनावरील लस तयार करण्यासाठी दिलेल्या योगदानासाठी त्यांचा सत्कार करण्यात आला होता.
याप्रकरणी मॉस्को पोलिसांनी एक निवेदन जारी केले आहे. २९ वर्षीय संशयीत आरोपीला ताब्यात घेतले असून त्याने हत्येची कबुली दिली असल्याचे या निवेदनातून सांगण्यात आले आहे. तसेच त्याच्यावर यापूर्वी सुद्धा हत्येचा गुन्हा दाखल असल्याची माहिती निवदेनाद्वारे देण्यात आली आहे.
