लोकशाही संपादकीय लेख
चौथ्यांदा पेट्रोल डिझेलची दरवाढ झाली आहे. आता सीएनजीचे दर देखील वाढले आहेत. पेट्रोल पंपांवर रांगांच्या रांगा लागत आहेत. काही पेट्रोल पंप पेट्रोल डिझेल अभावी बंद पडले आहेत. सरकार म्हणते की, पेट्रोल डिझेलचा तुटवडा नाही. ही कृत्रिम टंचाई आहे. ज्या पेट्रोल पंपांवर पेट्रोल डिझेल मिळत नाही तेथे पोलीस बंदोबस्तात पेट्रोल डिझेलचे वितरण केले जाईल. हे सर्व ठीक असले तरी आमचा शेतकरी मात्र डिझेल पासून वंचित आहे, हे खरे आहे. शेतकरी आता कॅन घेऊन रांगा न लावता आपले ट्रॅक्टर, जेसीबी किंवा इतर वाहने घेऊन पेट्रोल पंपावर येत आहेत. तेथे त्यांना रांगा लावून पेट्रोल व डिझेलचा भरणा केली जात आहे. सध्या शेतीमध्ये मशागतीचा पीक पिरेड आहे. अशा वेळी त्यांना डिझेल मिळाले नाही तर शेतीची कामे बंद पडतील. त्यामुळे शेतकऱ्यांना डिझेल मिळवण्यासाठी आटोकाट प्रयत्न करावे लागत आहेत. पेट्रोल पंपांवर पेट्रोल व डिझेल भरणारे काही लोक तेथील कर्मचाऱ्यांवर धाक दाखवतात, अपशब्द वापरतात आणि पेट्रोल मिळवतात. काही ठिकाणी तर कर्मचाऱ्यांना मारहाण देखील केली जाते. जळगावच्या एका पेट्रोल पंपावर कर्मचाऱ्याला काही गुंड प्रवृत्तीच्या लोकांनी चाकूने देखील भोसकले. अशा वेळी इंधन मिळविण्यासाठी जर मारामारी कराव्या लागत असतील तर हे चित्र अत्यंत विदारक आहे, असे म्हटले पाहिजे. अन्न मिळवण्यासाठी मारामारी होते असे आपण म्हणतो. पण इंधन मिळवण्यासाठी टोकाची भूमिका घेऊन हाणामारी होत असेल तर ते चित्र भयावह आहे..!
