लोकशाही न्यूज नेटवर्क
उत्तर प्रदेशातील गोरखपूर जिल्ह्यात कौटुंबिक वादातून घडलेल्या एका भीषण घटनेने परिसरात खळबळ उडाली आहे. एका १६ वर्षीय अल्पवयीन मुलाने आपल्या मोठ्या भावासह वहिनी आणि तीन वर्षांच्या लहान पुतण्याची हत्या केल्याचा आरोप करण्यात आला आहे. पोलिसांनी आरोपीला ताब्यात घेतले असून तपास सुरू आहे.
मिळालेल्या माहितीनुसार, ही घटना बांसगाव पोलीस ठाणे परिसरातील एका गावात पहाटेच्या सुमारास घडली. एकाच घरात राहणाऱ्या कुटुंबात मोठा आणि धाकटा भाऊ यांच्यात किराणा दुकानाच्या मालकी आणि कामकाजावरून दीर्घकाळापासून वाद सुरू असल्याचे समोर आले आहे. या वादातूनच ही घटना घडल्याचा संशय व्यक्त केला जात आहे.
घटनेच्या वेळी घरातील सदस्य गाढ झोपेत होते. त्याचवेळी आरोपीने धारदार शस्त्राने हल्ला केल्याचा आरोप आहे. या हल्ल्यात मोठा भाऊ, त्यांची पत्नी आणि तीन वर्षांचा मुलगा यांचा मृत्यू झाल्याचे सांगितले जाते. घरातील नऊ वर्षांची मुलगी या घटनेतून बचावली असून तिने आरडाओरडा करून कुटुंबीयांना घटनेची माहिती दिली.
मुलीच्या आवाजामुळे घरातील इतर सदस्य जागे झाले असता, घटनास्थळी रक्ताचे दृश्य दिसून आले. त्यानंतर तातडीने पोलिसांना माहिती देण्यात आली. पोलिसांनी घटनास्थळी धाव घेत आरोपीला ताब्यात घेतले. प्राथमिक तपासात कुटुंबातील वाद, तसेच आर्थिक कारणांवरून दोन्ही भावांमध्ये तणाव असल्याची माहिती समोर आली आहे. तसेच आरोपीच्या वर्तनाबाबत काही स्थानिकांनी संशय व्यक्त केला असून तो व्यसनाधीन असल्याचेही सांगितले जाते. पोलिसांनी प्रकरणाचा सखोल तपास सुरू केला असून घटनेमागील नेमके कारण आणि घडामोडींची पडताळणी केली जात आहे.
