बॅनर लावताना विजेच्या धक्क्याने प्रौढाचा मृत्यू
जळगाव – रस्त्यावर बॅनर लावत असताना अचानक विद्युत तारेचा स्पर्श झाल्याने अनिल पापा गवळी (वय ५२, रा. कांचननगर) यांचा दुर्दैवी मृत्यू झाला. ही घटना बुधवारी सकाळी साडेअकराच्या सुमारास कुसुंबा गावाजवळ घडली. याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे.
अनिल गवळी हे कांचननगर येथे पत्नी आणि दोन मुलांसह वास्तव्यास होते. बॅनर आणि जाहीराती लावण्याचे काम करून ते कुटुंबाचा उदरनिर्वाह करत होते. बुधवारी सकाळी ते कुसुंबा येथे लोखंडी फ्रेमवर बॅनर लावत असताना, अचानक जवळून गेलेल्या विद्युत तारेचा स्पर्श झाला आणि त्यांना जोरदार विजेचा धक्का बसला.
त्यामुळे ते उंचावरून खाली कोसळले आणि जागीच मृत्यू झाला. अपघात होताच परिसरातील नागरिकांनी तातडीने अनिल गवळी यांना जिल्हा रुग्णालयात हलवले. मात्र, वैद्यकीय अधिकाऱ्यांनी त्यांना मृत घोषित केले. या घटनेनंतर रुग्णालयात नातेवाईकांची गर्दी झाली होती
याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली असून, पुढील तपास सुरू आहे.
