जुन्नर, लोकशाही न्यूज नेटवर्क
शिवप्रेमींसाठी दुःखद बातमी आहे. राज्यभरातून शिवज्योती घेऊन आलेल्या शिवभक्तांसाठी प्रशासनाने विशेष निर्णय घेतला. पहिल्या पायरीवरच शिवज्योतींचे पूजन आणि प्रज्वलन करून त्यानंतर त्या विविध भागांत मार्गस्थ करण्याचा निर्णय घेण्यात आला.
रविवारी शिवनेरी गडावर मधमाश्यांच्या हल्ल्याच्या घटनेनंतर दुपारपासून पुरातत्त्व विभाग आणि वन विभागाने शिवभक्तांना गडावर जाण्यासाठी पहिला दरवाजा बंद केला. पायरी मार्गावरील पायऱ्यांवर बॅरिकेड लावून प्रवेश रोखण्यात आला.
शिवनेरीवर मोठ्या प्रमाणात होणारी शिवभक्तांची गर्दी, काही पर्यटकांचे अनिर्बंध वर्तन, कॅमेऱ्याचा फ्लॅश वापरणे, तसेच काही अज्ञानी लोकांकडून मधमाश्यांच्या पोळ्यांना दगड मारण्यासारखे उपद्रवी कृत्य केल्याने अशा घटना घडत आहेत. याशिवाय, शिवज्योतींमधून निर्माण होणारा धूर मधमाश्यांना त्रासदायक ठरत असल्याने त्यांचे हल्ले होत असल्याचे तज्ज्ञांचे मत आहे.
कोणती काळजी घ्यावी
धुरामुळे मधमाश्यांना त्रास होतो, त्यामुळे पोळ्यांच्या आसपास धूर होणार नाही याची दक्षता घ्यावी. तसेच, लाल किंवा भडक रंगाचे कपडे परिधान करू नयेत, मोठ्या आवाजात गोंगाट टाळावा, अत्तर, डिओड्रंट किंवा सुवासिक तेलाचा वापर करू नये. ट्रेक करताना पुरेशी खबरदारी घेण्याचे आवाहन कृषी कीटकशास्त्रज्ञ प्रा. हेमंतकुमार डुंबरे यांनी केले आहे.
काही खोडसाळ युवकांनी दगड मारून मधमाश्यांचे पोळे उध्वस्त केल्याने संतप्त मधमाश्यांनी गडावर आलेल्या पर्यटकांवर हल्ला चढविला. या हल्ल्यात 47 जण जखमी झाले. सोमवारी तिथीप्रमाणे शिवजयंती असल्याने शिवनेरीवर शिवभक्तांची मोठी गर्दी झाली होती. शिवभक्तांनी आणलेल्या मशालींमुळे निर्माण झालेल्या धुरामुळेही मधमाश्या बिथरल्या आणि हल्ला झाला. सकाळी नऊच्या सुमारास शिवाई देवी मंदिराकडे जाणाऱ्या मार्गावर ही घटना घडली.
घटनेनंतर गडावर एकच गोंधळ उडाला. वन विभाग, पुरातत्त्व विभाग आणि जुन्नर रेस्क्यू टीमच्या सदस्यांनी घटनास्थळी धाव घेतली आणि जखमींना तातडीने खाली आणले. सरकारी रुग्णवाहिकांसह तीन खासगी रुग्णवाहिका गडावर दाखल झाल्या आणि जखमींना जुन्नरच्या छत्रपती शिवाजी ग्रामीण रुग्णालयात हलवण्यात आले. तेथे डॉ. जाहीद हसन आणि त्यांच्या सहकाऱ्यांनी जखमींवर उपचार केले.
