मुंबई, लोकशाही न्युज नेटवर्क
आदल्या दिवसाच्या दमदार तेजीनंतर शुक्रवारी, आठवड्याच्या शेवटच्या व्यापार दिवशी, भारतीय शेअर मार्केटमध्ये मंदीचा जोर पाहायला मिळत आहे. आठवड्याच्या शेवटच्या ट्रेडिंग दिवशी, शुक्रवारी दिवसाची सुरुवात घसरणीने झाली असून सेन्सेक्स आणि निफ्टीने दिवसाची सुरुवात सुस्तीने केली. सेन्सेक्स सकाळी प्री-ओपनिंगला 216.03 अंकांनी किंवा 0.26 टक्के घसरून 82,314.71 वर उघडला तर, निफ्टी 34.20 अंकांनी म्हणजेच 0.14 टक्के घसरून 25,014.70 च्या पातळीवर व्यवहार करत आहे. बीएसई मिडकॅप आणि स्मॉलकॅप निर्देशांक 0.5 टक्के वधारले तर क्षेत्रीय आधारावर, बँक, आयटी, फार्मा वगळता इतर सर्व निर्देशांक हिरव्या रंगात व्यवहार करत आहेत.
कुठे तेजी, कुठे घसरण
देशांतर्गत शेअर बाजाराची सुरुवात सुस्तीने झाली. सेन्सेक्स 200 पेक्षा जास्त अंकांच्या घसरला तर निफ्टी 25,000 च्या पातळीपेक्षा किंचित खाली घसरला. भारती एअरटेल, इंडसइंड बँक, इन्फोसिस सारख्या शेअर्समध्ये सर्वात मोठी घसरण नोंदवली गेली असून आयशर मोटर्स, बजाज फिनसर्व्ह, एसबीआय, सिप्ला, कोल इंडिया यांसारख्या समभागांना सर्वाधिक तेजी मिळाली. आयटी, फार्मा, हेल्थकेअर आणि खाजगी बँक निर्देशांकांमध्ये पडझड होताना ग्राहकोपयोगी वस्तू आणि वित्तीय समभागांनी कमाल ताकद दाखवली.
एकूण चित्र पाहिले तर बाजाराची डोकेदुखी बनलेले टॅरिफ वॉर आणि भू-राजकीय तणाव कमी होताना दिसत आहेत, ज्याचा परिणाम गुरुवारच्या सत्रात दिसून आला. ऑक्टोबरनंतर पहिल्यांदाच निफ्टीने पुन्हा 25,000 चा टप्पा ओलांडला असून आदल्या दिवसाच्या मोठ्या तेजीत FII नीही मोठ्या प्रमाणात खरेदी केली. रोख, निर्देशांक आणि स्टॉक फ्युचर्ससह 16,200 कोटी रुपयांची निव्वळ खरेदी झाली.
दरम्यान घसरत्या बाजारातही अदानी समूहाच्या शेअर्सनी ताकद दाखवली. सुरुवातीच्या व्यवहारात अदानी टोटल गॅस, अदानी पॉवर आणि अदानी ग्रीन एनर्जी 3% हून अधिक वाढीसह व्यवहार करत होते. तर अदनींची प्रमुख कंपनी अदानी एंटरप्रायझेस, अदानी ग्रीन एनर्जी, अदानी एनर्जी सोल्युशन्स आणि अदानी पोर्ट्समध्येही 1 टक्के हून अधिक वाढ झाली. गुंतवणूकदारांनी या समभागांबद्दल सकारात्मक भूमिका स्वीकारली आहे, जी कालच्या जोरदार तेजीनंतरही कायम राहिली असून अदानी समूहाच्या कंपन्यांवरील गुंतवणूकदारांचा विश्वास अबाधित असल्याचे पुन्हा एकदा स्पष्ट होत आहे.
शेअर बाजारात तेजीचे वादळ
याआधी गुरुवारी देशांतर्गत बाजारात सर्वांगीण खरेदी आणि परदेशी संस्थात्मक गुंतवणूकदारांकडून भांडवलाच्या ओघामुळे स्थानिक शेअर बाजार सलग दुसऱ्या दिवशी तेजीत राहिला. बीएसई सेन्सेक्स 1,200 अंकांची उसळी घेतली तर एनएसई निफ्टीने सात महिन्यांनंतर पुन्हा 25,000 अंकांचा टप्पा ओलांडला.
