लोकशाही न्यूज नेटवर्क
सोन्या-चांदीच्या दरात पुन्हा एकदा जोरदार तेजी पाहायला मिळत आहे. मल्टी कमोडिटी एक्सचेंज अर्थात एमसीएस्क्सवर ऑगस्ट महिन्यात सोन्याच्या दरात आतापर्यंत सुमारे १९ हजार रुपये प्रति १० ग्रॅमची वाढ झाली आहे. सलग पाचव्या आठवड्यात सोन्याच्या दरात तेजी कायम राहिल्याने ग्राहकांसह गुंतवणूकदारांचेही लक्ष सोन्याच्या पुढील दरवाढीकडे लागले आहे.
गेल्या काही आठवड्यांपासून सोन्याच्या किमतीत सातत्याने वाढ होत आहे. एमसीएस्क्स वर गेल्या आठवड्यात सोन्याच्या दरात सुमारे ८ हजार रुपये प्रति १० ग्रॅमची वाढ झाली. त्यामुळे सोन्याचा भाव १,६२,४३८ रुपये प्रति १० ग्रॅम या पातळीवर पोहोचला. ऑगस्ट महिन्यात आतापर्यंत सोन्याच्या किमतीत सुमारे १३.३० टक्के म्हणजेच १९ हजार रुपयांची वाढ झाल्याचे सांगितले जात आहे. त्यामुळे सोन्याने यापूर्वी झालेली घसरण भरून काढत पुन्हा विक्रमी पातळीकडे वाटचाल सुरू केली आहे.
सोन्यासोबतच चांदीच्या दरातही मोठी वाढ झाली आहे. शुक्रवारी चांदीच्या दरात १०,६७३ रुपये प्रति किलोची वाढ होऊन भाव २,४८,१२४ रुपये प्रति किलो झाला. त्यामुळे चांदीकडेही गुंतवणूकदारांचा कल वाढताना दिसत आहे.
सोन्याच्या दरातील तेजीमागे अमेरिकन डॉलरची कमजोरी हे महत्त्वाचे कारण मानले जात आहे. डॉलरचा दर मागील जवळपास तीन महिन्यांच्या तुलनेत घसरल्याने गुंतवणूकदारांचा कल सोन्यासारख्या सुरक्षित गुंतवणुकीकडे वाढला आहे. जागतिक बाजारातील घडामोडी आणि डॉलरच्या हालचालींचा परिणाम आगामी काळातही सोन्या-चांदीच्या दरावर होण्याची शक्यता आहे. सोन्याचा दर सातत्याने वाढत असल्याने ग्राहकांसाठी खरेदी महागली असून, गुंतवणूकदारांसाठी मात्र सोन्याच्या पुढील वाटचालीकडे उत्सुकता निर्माण झाली आहे.
२०२६ मध्ये सोन्यात २० टक्क्यांची वाढ
चालू वर्षात आतापर्यंत सोन्याच्या किमतीत सुमारे २० टक्क्यांची वाढ झाली आहे. या तेजीमुळे सोन्याचा दर यापूर्वी नोंदवलेल्या १,८०,७७९ रुपये प्रति १० ग्रॅम या विक्रमी उच्चांकाच्या जवळ पोहोचला आहे. त्यामुळे आगामी काळात सोन्याचा भाव नवा विक्रम प्रस्थापित करणार का, याकडे गुंतवणूकदारांचे लक्ष लागले आहे.
