मुंबई
राष्ट्रवादी काँग्रेस पक्ष शरदचंद्र पवार पक्षाचे राष्ट्रीय अध्यक्ष शरद पवार यांच्या जीविताला धोका असल्याचा अहवाल समोर आल्यानंतर त्यांना केंद्र सरकारने ‘झेड प्लस’ दर्जाची सुरक्षा प्रदान केली आहे. अशी सुरक्षा देशातली अतिमहत्त्वाच्या व्यक्तींना दिली जाते. केंद्रीय गृहविभागाने पवार यांना असलेल्या धोक्याच्या पार्श्वभूमीवर हा निर्णय घेतल्याचे बोलले जात आहे. यापुढे पवार यांना केंद्रीय राखीव पोलिस दलाचे (सीआरपीएफ) जवान सुरक्षा देतील.
केंद्रीय गृह मंत्रालयाने केंद्रीय राखीव पोलीस दलाला महाराष्ट्राच्या 83 वर्षीय माजी मुख्यमंत्री आणि राज्यातील महत्त्वाचे नेते शरद पवार यांना झेड प्लस सुरक्षा पुरवण्यास सांगितले आहे. या कामासाठी 55 सशस्त्र सीआरपीएफ जवानांची तुकडी तैनात करण्यात आली आहे, ही तुकडी शरद पवाराच्या ताफ्यात सामील होईल. महाराष्ट्रात लवकरच विधानसभा निवडणुकीची धामधूम सुरू होत आहे. तर दुसरीकडे मराठा-ओबीसी आरक्षण वादही धुमसत आहे. शरद पवार यांच्यावर याआधी हल्ला करण्यात आला होता. तसेच, त्यांच्यावर शाईफेकीची घटनाही घडली होती. त्यातच अवघ्या काही दिवसांपूर्वीच राज ठाकरे, उद्धव ठाकरे यांच्या वाहनावर आंदोलकांकडून हल्ला करत त्यांचा ताफा अडवण्याचा प्रयत्न झाला होता. यातच मराठा आरक्षणाच्या प्रश्नावर पवार यांच्यावर सातत्याने टीका होत असून, याविषयीचे अहवाल गुप्तचर विभागाने केंद्रीय यंत्रणांना पाठवले होते.
धोका असल्याचा निष्कर्ष
केंद्रीय यंत्रणांकडून देशातील कोणत्या महत्त्वाच्या व्यक्तींच्या जिवाला धोका आहे, याचा कालबद्ध आढावा घेण्यात येतो. यादरम्यान पवार यांना धोका असल्याचा निष्कर्ष काढण्यात आला. तसेच, त्यांना सशस्त्र सुरक्षा देण्यात यावी, अशी शिफारस करण्यात आली आहे. त्यानुसार, गृहविभागाने सीआरपीएफला 55 सशस्त्र जवान त्यांच्या सुरक्षेसाठी उपलब्ध करुन देण्याविषयी पत्रव्यवहार केला आहे. राज्यात असलेल्या सीआरपीएफच्या तुकडीकडून तातडीने पवार यांना ही सुरक्षा लागू होणार आहे.
