मुंबई – राष्ट्रवादी शरदचंद्र पवार पक्षाचे आमदार रोहित पवार यांना मोठा धक्का बसला आहे. रोहित पवार यांच्यावर मनी लाँड्रिंग प्रकरणात ईडीकडून आरोपपत्र दाखल करण्यात आले आहे. मुंबई पोलिसांच्या आर्थिक गुन्हे शाखेने 2019 मध्ये हा गुन्हा दाखल केला होता. शिखर बँकेचे तत्कालीन अधिकारी आणि संचालकांनी योग्य प्रक्रिया न करता त्यांच्या नातेवाईकांना खासगी व्यक्तींना कवडीमोल किंमतीत सहकारी साखर कारखाना विकल्याचा तपास यंत्रणेचा आरोप आहे. ईडीकडून रोहित पवार आणि काही जणांवर पुरवणी आरोपपत्र दाखल केले आहे. न्यायालयाकडून या आरोपपत्राची दखल घेणे अद्याप बाकी आहे.
मार्च 2023 मध्ये, एजन्सीने बारामती ॲग्रोची 50.20 कोटी रुपयांची मालमत्ता तात्पुरती जप्त केली, ज्यात 161.30 एकर जमीन, एक साखर कारखाना, मशिनरी आणि औरंगाबादमधील कन्नड येथे असलेल्या इमारतींचा समावेश आहे. गेल्या वर्षी जानेवारीमध्ये ईडीने रोहित पवार यांच्या बारामती ॲग्रोसह अन्य संबंधित ठिकाणी छापे टाकले होते. छाप्यांनंतर कर्जत-जामखेडचे आमदार रोहित पवार यांना ईडीच्या मुंबई कार्यालयात समन्स बजावण्यात आले आणि त्यांची चौकशी करण्यात आली.
चौकशी अहवालात दोषी
ईडीचा दावा आहे की ही मालमत्ता कन्नड सहकारी साखर कारखाना लिमिटेड (कन्नड एसएसके) ची आहे, जी बारामती ॲग्रोने कथितरित्या लिलावाद्वारे विकत घेतली. एजन्सीनुसार, ही मालमत्ता ‘गुन्ह्यातून मिळवलेली’ असल्यामुळे, हा व्यवहार मनी लाँड्रिंग कायद्याचे उल्लंघन आहे. मनी लाँड्रिंगचा तपास मुंबई पोलिसांच्या आर्थिक गुन्हे शाखेने ऑगस्ट 2019 मध्ये दाखल केलेल्या एफआयआरवर आधारित आहे. यात विविध आयपीसी आणि भ्रष्टाचार प्रतिबंधक कायद्याच्या कलमांनुसार आरोप आहेत.
