चंद्रपूर, लोकशाही न्यूज नेटवर्क
भद्रावती तालुक्यात अवैध रेती वाहतूक सुरू असल्याचे पुन्हा एकदा उघड झाले आहे. महसूल विभागाने केलेल्या धडक कारवाईत दोन मोठी वाहने रंगेहात पकडून जप्त करण्यात आली. या कारवाईत एक हायवा (८ ब्रास रेतीसह) आणि एक ट्रक (१० ब्रास रेतीसह) ताब्यात घेण्यात आला.
महसूल सूत्रांच्या माहितीनुसार, तहसील मंडळ अधिकारी समीर वाटेकर यांना मिळालेल्या गोपनीय माहितीच्या आधारे पथकाने सापळा रचला. चंद्रपूरवरून अवैध रेती घेऊन येणाऱ्या वाहनांवर लक्ष ठेवण्यात आले होते. पहाटे सुमारे ५ वाजता MH-34 CQ 6099 क्रमांकाचा हायवा गुलमोहर पार्क, चिचोर्डी येथे रेती उतरत असताना रंगेहात पकडण्यात आला.
तपासणीदरम्यान संबंधितांकडे कोणताही वैध परवाना नसल्याचे आढळून आले. त्यामुळे सुमारे ८ ब्रास रेतीसह हायवा जप्त करून संबंधितांवर दंडात्मक कारवाई करण्यात आली. पुढील तपासात हा हायवा चंद्रपूर येथील मीथलेश चन्ने यांच्या मालकीचा असल्याचे स्पष्ट झाले.
दरम्यान, याच दिवशी डॉली पेट्रोल पंप परिसरात महसूल पथकाने आणखी एक मोठा ट्रक सापळा रचून पकडला. या ट्रकमध्ये सुमारे १० ब्रास रेती आढळून आली. तपासात हा ट्रक नागपूर (उमरेड) येथील वहीद शेख यांच्या मालकीचा असल्याची माहिती समोर आली आहे.
ही कारवाई R.I. समीर वाटेकर, ग्राम महसूल अधिकारी तलहार, ग्राम महसूल अधिकारी तळवेकर आणि त्यांच्या पथकाने संयुक्तरित्या पार पाडली.
वाढत्या अवैध वाहतुकीवर प्रश्नचिन्ह
भद्रावती तालुक्यात अवैध रेती वाहतूक इतक्या उघडपणे कशी सुरू आहे, हा प्रश्न पुन्हा एकदा उपस्थित झाला आहे. पहाटेच्या वेळी मोठ्या प्रमाणात रेतीची वाहतूक होत असल्याने मोठ्या रॅकेटचा संशय व्यक्त केला जात आहे. विशेष म्हणजे, बाहेरच्या जिल्ह्यातील वाहनांचाही या प्रकरणात सहभाग असल्याचे दिसून येत आहे. कारवाई होत असल्या तरी या अवैध वाहतुकीवर खरोखरच आळा बसणार का, याकडे नागरिकांचे लक्ष लागले आहे.
