बोरघाटात क्लूझरचा भीषण अपघात ; १ ठार,११ जखमी
पाल ता. रावेर – पाल–खिरोदा दरम्यान असलेल्या बोरघाटात दि. १० ऑक्टोबर सकाळी सुमारास १० वाजता क्लूझर (क्र. MH19 CF 3920) वाहनाचा भीषण अपघात झाला. भुसावळ तालुक्यातील अंजनसोंडे येथील नागरिक पालकडे येत असताना चालकाचे वाहनावरील नियंत्रण सुटल्याने हा अपघात झाला. या घटनेत एकाचा मृत्यू तर ११ प्रवासी जखमी झाले. मिळालेल्या माहितीनुसार, बोरघाटातील वळणावर क्लूझरचे नियंत्रण सुटल्याने वाहन रस्त्याच्या कडेला घसरले आणि झाडांना धडकून उलटले. मार्गावरील जाणाऱ्या नागरिकांनी तातडीने धाव घेत जखमींना बाहेर काढले. जखमींना प्राथमिक उपचारासाठी पाल ग्रामीण रुग्णालयात दाखल करण्यात आले असून गंभीर जखमींना पुढील उपचारासाठी जळगाव जिल्हा रुग्णालयात हलविण्यात आले आहे.
जखमींची नावे – पद्माकर पाटील (वय ६२), गणेश चौधरी (वय ६४), गोपाळ कोळी (वय ७१) आणि चालक प्रशांत चौधरी (वय ४८) अशी आहेत. मृत व्यक्तीचे नाव विजय राणे (वय ५५, रा. अंजनसोंडे) असे असून, त्यांचा घटनास्थळीच मृत्यू झाल्याची माहिती मिळाली आहे. घटनास्थळाचा पंचनामा करून पोलिसांनी पुढील तपास सुरू केला आहे.
