लोकशाही न्यूज नेटवर्क
बॉलिवूड अभिनेत्री रवीना टंडन यांच्या कुटुंबीयांच्या घरात झालेल्या चोरीच्या प्रकरणाने खळबळ उडाली आहे. रवीना टंडन यांचे बंधू राजीव टंडन यांच्या जुहू येथील निवासस्थानातून सुमारे २५ लाख रुपये किमतीचे सोन्या-हिऱ्यांचे दागिने आणि महागडी घड्याळे चोरीला गेल्याची घटना उघडकीस आली आहे. या प्रकरणी पोलिसांनी राशी छब्रिया (वय ४७) या महिलेला अटक केली आहे.
मिळालेल्या माहितीनुसार, राशी छब्रिया ही गेल्या काही वर्षांपासून रवीना टंडन यांच्या आई वीणा टंडन यांची देखभाल करण्यासाठी काम करत होती. त्यामुळे तिचा घरात मुक्त वावर होता. ऑगस्ट २०२५ मध्ये घराच्या दुरुस्तीचे काम सुरू असताना अनेक मौल्यवान वस्तू अन्यत्र हलविण्यात आल्या होत्या. मात्र वीणा टंडन यांचे सोन्या-हिऱ्यांचे दागिने घरातील तिजोरीत सुरक्षित ठेवण्यात आले होते.
२ ऑक्टोबर २०२५ रोजी दसरा सणानिमित्त कुटुंबीयांनी तिजोरीची पाहणी केली असता ती फोडलेली आढळून आली. तसेच तिजोरीतील सोन्याचे व हिऱ्यांचे दागिने आणि राजीव टंडन यांची दोन महागडी मनगटी घड्याळे चोरीला गेल्याचे समोर आले.
पोलिसांच्या तपासात राशी छब्रिया हिच्यावर संशय व्यक्त करण्यात आला. सुरुवातीला तिने चोरीबाबत अनभिज्ञता दर्शविली. मात्र कुटुंबीयांनी पोलिसांत तक्रार करण्याचा निर्णय घेतल्यानंतर तिने तिजोरी फोडून दागिने आणि घड्याळे घेतल्याची कबुली दिल्याचे पोलिसांनी सांगितले. तिने दोन घड्याळे परत केली असली तरी दागिने मात्र अद्याप मिळालेले नाहीत.
चोरीस गेलेल्या दागिन्यांमध्ये सोन्याच्या बांगड्या, हार, अंगठ्या, कानातले, ब्रेसलेट्स, हिरे जडवलेले मंगळसूत्र तसेच अन्य मौल्यवान दागिन्यांचा समावेश असून त्यांची एकूण किंमत सुमारे २५ लाख रुपये असल्याचे सांगण्यात आले आहे. राजीव टंडन यांनी दिलेल्या तक्रारीवरून जुहू पोलिसांनी १९ मे रोजी गुन्हा दाखल केला. त्यानंतर २१ मे रोजी राशी छब्रिया हिला अटक करण्यात आली. न्यायालयाने तिला पोलीस कोठडी सुनावली होती. सध्या चोरीस गेलेल्या दागिन्यांचा शोध घेण्याचे काम सुरू असून पोलिसांकडून पुढील तपास करण्यात येत आहे.
