जुन्या कार्यकर्त्यांच्या निष्क्रियतेबद्दल चिंता !

नाशिक, लोकशाही न्यूज नेटवर्क

आगामी महापालिका निवडणुकांसाठी सज्ज व्हा, असे निर्देश महाराष्ट्र नवनिर्माण सेनेचे अध्यक्ष राज ठाकरे यांनी पक्षाच्या पदाधिकारी आणि कार्यकर्त्यांना दिले. मनपा निवडणुकांच्या पार्श्वभूमीवर राज ठाकरे नाशिक दौऱ्यावर होते. लोकसभा आणि विधानसभा निवडणुकीची प्रक्रिया पार पडल्यानंतर आता सर्व राजकीय पक्षांना महापालिका आणि जिल्हा परिषद या स्थानिक स्वराज्य संस्थांच्या निवडणुकांचे वेध लागले आहेत. एप्रिल-मे महिन्यात या निवडणुका होण्याची शक्यता असून, राजकीय पक्षांनी आतापासूनच कंबर कसण्यास सुरुवात केली आहे. याच पार्श्वभूमीवर मनसेप्रमुख राज ठाकरे दोन दिवस नाशिक दौऱ्यावर आले होते.

यादरम्यान त्यांनी पक्ष पदाधिकारी आणि कार्यकर्त्यांशी संवाद साधला. निवडणुकांना सामोरे जाण्यासाठी तयारीला लागा. निवडणुका जिंकायच्या असतील, तर संघटन मजबूत करून समन्वयाने काम करावे लागेल, अशा सूचना यावेळी करण्यात आल्या. शहर आणि जिल्हा पातळीवरील संघटनेची पुनर्रचना करण्याचे संकेत बैठकीत देण्यात आले. पक्षाच्या पदाधिकाऱ्यांमधील समन्वयाचा अभाव आणि जुन्या कार्यकर्त्यांच्या निष्क्रियतेबद्दल राज यांनी चिंता व्यक्त केली.

सर्व जुन्या कार्यकर्त्यांना आणि पदाधिकाऱ्यांना पक्षात सक्रिय करण्याचे निर्देश राज ठाकरे यांनी दिले. शहरात पक्षाचा पाया मजबूत करण्यासाठी विविध उपक्रम राबविण्याच्या सूचनाही यावेळी करण्यात आल्या. मनसेच्या काळात झालेल्या विविध विकासकामांची माहिती लोकांपर्यंत पोहोचवा असेही ते म्हणाले. दि. 30 जानेवारी रोजी मुंबईत बैठक होणार असून, पक्ष पदाधिकाऱ्यांनी उपस्थित राहण्याचे निर्देश त्यांनी दिले.