चाळीसगाव : चाळीसगाव ग्रामीण पोलीस स्टेशनच्या पथकाने तळेगाव येथे सुरू असलेल्या जुगार अड्ड्यावर छापा टाकून 9 जणांना ताब्यात घेतले असून एकूण 4 लाख 21 हजार 430 रुपयांचा मुद्देमाल जप्त करण्यात आला आहे.
पोलीस सूत्रांकडून मिळालेल्या माहितीनुसार, दि. 11 एप्रिल रोजी सायंकाळी सुमारे 5.35 वाजण्याच्या सुमारास तळेगाव येथील मराठी शाळेजवळील मोकळ्या जागेत काही इसम पत्त्यांवर जुगार खेळत असल्याची माहिती सहाय्यक पोलीस निरीक्षक नितीन पाटील यांना मिळाली. त्यानुसार पोलीस पथकाने तत्काळ घटनास्थळी छापा टाकला. या कारवाईत विजय देवरे, प्रविण देवरे, बापू नाईकुडे, एकनाथ राठोड, छोटुलाल पाटील, अमोल गोरे, प्रदीप म्हस्के, हेमेन्द्र पाटील व नाना पाटील या नऊ जणांना जागीच पकडण्यात आले. तसेच हा जुगार अड्डा तुषार देशमुख (रा. तळेगाव) चालवत असल्याचे निष्पन्न झाले आहे. छाप्यात आरोपींकडून रोख रक्कम 69,230 रुपये, विविध कंपनीचे मोबाईल फोन सुमारे 50 हजार रुपये किंमतीचे, तसेच सुमारे 3 लाख रुपये किंमतीच्या मोटारसायकली, जुगारासाठी वापरले जाणारे साहित्य आणि इतर वस्तू असा एकूण 4,21,430 रुपयांचा मुद्देमाल जप्त करण्यात आला आहे. याप्रकरणी सर्व आरोपींविरुद्ध महाराष्ट्र जुगार प्रतिबंधक कायदा कलम 4, 5 व 12 (अ) अन्वये चाळीसगाव ग्रामीण पोलीस स्टेशन येथे गुन्हा दाखल करण्यात आला असून पुढील तपास सुरू आहे.
