|| लोकशाही न्यूज नेटवर्क ||
पिंपळगाव हरेश्वर पोलीस स्टेशनच्या पथकाने गुप्त माहितीच्या आधारे मोठी कारवाई करत गहुले धरण व बहुळा नदी परिसरातील अवैध हातभट्टी दारू निर्मितीवर आळा घातला. या कारवाईत सुमारे १ लाख ५८ हजार २५० रुपयांचा मुद्देमाल नष्ट करण्यात आला असून संबंधित आरोपींविरोधात गुन्हे दाखल करण्यात आले आहेत.
दिनांक ११ एप्रिल २०२६ रोजी सहाय्यक पोलीस निरीक्षक कल्याणी वर्मा यांना गुप्त बातमीदारामार्फत माहिती मिळाली की, शिंदाड बिट हद्दीतील गहुले धरण व बहुळा नदीच्या काठावर काही इसम झाडाझुडपात गावठी हातभट्टी दारू तयार करत आहेत. या माहितीच्या आधारे तत्काळ पोलीस पथक तयार करून छापा टाकण्यात आला.
गहुले धरण परिसरात आरोपी बुधा दगडू तडवी, फरीदा बुधा तडवी, रहेमान अन्वर तडवी आणि सचिन मनोज तडवी (सर्व रा. शिंदाड, ता. पाचोरा) हे दारू निर्मिती करताना आढळून आले. तसेच बहुळा नदीकाठी सुनिल राजू भिल (रा. इंदिरानगर, लोहारी) व गोपाल नागो राठोड (रा. आंबेवडगाव, ता. पाचोरा) हे देखील अवैध दारू तयार करताना पकडले गेले.
या कारवाईत पोलिसांनी एकूण ३६०० लिटर कच्चे रसायन (किंमत १,२६,००० रुपये), ४५० लिटर उकळते पक्के रसायन (किंमत १५,७५० रुपये) आणि १६५ लिटर तयार हातभट्टी दारू (किंमत १६,५०० रुपये) असा एकूण ४२१५ लिटर दारूसंबंधित मुद्देमाल जप्त केला. हा सर्व मुद्देमाल घटनास्थळीच नष्ट करण्यात आला तसेच दारूच्या भट्ट्या उद्ध्वस्त करण्यात आल्या.
या प्रकरणी सर्व आरोपींविरोधात महाराष्ट्र दारुबंदी अधिनियम कलम ६५ (फ), (ब), (क), (ई) अन्वये एकूण पाच गुन्हे दाखल करण्यात आले आहेत. दरम्यान, मोंढाळे येथे स्वतंत्र कारवाईत विनोद अरविंद गुंजाळ हा इसम बसस्थानकाजवळ अवैधरित्या देशी दारू विक्री करताना आढळून आला. त्याच्याकडून ३८ देशी दारूच्या बाटल्या (किंमत १५२० रुपये) जप्त करून त्याच्याविरोधातही संबंधित कलमान्वये गुन्हा दाखल करण्यात आला आहे.
