पारोळा, लोकशाही न्यूज नेटवर्क
पारोळा येथील राष्ट्रीय महामार्ग क्रमांक ५३ वर हळदीच्या कार्यक्रमानिमित्त पारोळा येथे येत असताना मागाहून येणाऱ्या कारने दुचाकीला धडक दिल्याने मागे बसलेल्या ७५ वर्षीय कमलबाई नारायण माळी यांचा मृत्यू झाल्याची घटना घडली.
मिळालेल्या माहितीनुसार, पारोळा तालुक्यातील बाभडेनाग येथील पृथ्वीराज धनराज माळी हे आपल्या आजी कमलबाई नारायण माळी (वय ७५, दोघे रा. बाभळेनाग) ह्यांच्या सोबत दुचाकी (एमएच १९, डीके ८४०२) ने पारोळा येथील नातेवाईकांकडे लग्नापूर्वी असलेल्या हळदीचा कार्यक्रमासाठी येत असताना राष्ट्रीय महामार्ग क्रमांक ५३ वरील हिरापूर फाट्याजवळ मागून येणाऱ्या कार (एमएच- २०, बीटी- ८३९२) ने त्यांच्या दुचाकीला जोरदार धडक दिल्याने दुचाकी वरील पृथ्वीराज माळी व कमलबाई माळी हे दोघे खाली पडले.
या दुर्दैवी अपघातात कमलबाई माळी यांचा मृत्यू झाला तर पृथ्वीराज माळी हे गंभीर जखमी झाल्याची घटना घडली. याबाबत कार चालकाविरुद्ध पारोळा पोलीस स्टेशनला गुन्हा दाखल करण्यात आला असून पुढील तपास पारोळा पोलिस करीत आहेत.