जळगाव, लोकशाही न्यूज नेटवर्क
जिल्ह्यात कायदा व सुव्यवस्था अधिक मजबूत करण्याच्या उद्देशाने पोलीस प्रशासनाने अवैध प्रवासी वाहतूक, अंमली पदार्थांची तस्करी आणि बेकायदेशीर शस्त्रास्त्रांची हालचाल रोखण्यासाठी मोठी धडक कारवाई हाती घेतली. रविवारी रात्री राबविण्यात आलेल्या ‘नाईट कोम्बिंग ऑपरेशन’ अंतर्गत शहरातील विविध प्रवेशद्वारांवर नाकाबंदी करून तब्बल 70 खाजगी ट्रॅव्हल्स बसेसची सखोल तपासणी करण्यात आली. या कारवाईदरम्यान वाहतूक नियमांचे उल्लंघन करणाऱ्या वाहनधारकांकडून सुमारे 20 हजार रुपयांचा थकीत दंडही वसूल करण्यात आला.
ही विशेष मोहीम दोन टप्प्यांत राबविण्यात आली. रात्री 8 ते 12 आणि पहाटे 4 ते 7 या वेळेत पोलीस पथकांनी शहरातील आकाशवाणी चौक, अजिंठा चौफुली, भुसावळ नाका आणि अमळनेर स्टॉप (पारोळा) यांसारख्या महत्त्वाच्या ठिकाणी नाकाबंदी करून तपासणी केली. या कारवाईत आरसीपीच्या चार प्लाटून्स, गुन्हे शोध पथकाच्या चार प्लाटून्स तसेच शहर वाहतूक शाखा आणि विविध पोलीस ठाण्यांतील अधिकारी व अंमलदारांचा मोठ्या प्रमाणात सहभाग होता. तपासणीदरम्यान सर्व बसेसची काटेकोर झडती घेण्यात आली. चालक आणि वाहकांना कोणत्याही प्रकारचे अवैध अंमली पदार्थ, विनापरवाना शस्त्रास्त्रे किंवा प्रतिबंधित वस्तूंची वाहतूक न करण्याबाबत कडक सूचना देण्यात आल्या. यासोबतच प्रवाशांच्या सुरक्षिततेच्या दृष्टीने बसमधील फायर एक्स्टिंग्विशर, इमर्जन्सी एक्झिट या सारख्या सुरक्षा सुविधांचीही पाहणी करण्यात आली.
लांब पल्ल्याच्या प्रवासासाठी दोन चालक नियम अनिवार्य असल्याचे पुन्हा अधोरेखित करत त्याचे उल्लंघन करणाऱ्या ट्रॅव्हल्स चालक व मालकांवर कठोर कारवाईचा इशाराही देण्यात आला. ई-चलन प्रणालीच्या माध्यमातून वाहनांची तपासणी करताना अनेक वाहनांवर प्रलंबित दंड आढळून आला, जो तत्काळ वसूल करण्यात आला. ही कारवाई पोलीस अधीक्षक श्रीकांत धिवरे, अपर पोलीस अधीक्षक (चाळीसगाव) कविता नेरकर आणि अपर पोलीस अधीक्षक (जळगाव) संदीप गावीत यांच्या मार्गदर्शनाखाली पार पडली. जिल्ह्यात शांतता व सुरक्षितता अबाधित राखण्यासाठी अशा प्रकारच्या विशेष मोहिमा यापुढेही सातत्याने राबविण्यात येणार असल्याचे पोलीस प्रशासनाने स्पष्ट केले आहे.
