लोकशाही न्यूज नेटवर्क
राज्यातील अनेक भागांमध्ये पेट्रोल आणि डिझेलचा तुटवडा जाणवत असून, पेट्रोल पंपांवर वाहनांच्या लांबलचक रांगा लागलेल्या दिसत आहेत. काही ठिकाणी इंधनाचा साठा संपल्याने पंप तात्पुरते बंद ठेवण्याची वेळ आली आहे. त्यामुळे सर्वसामान्य नागरिक, वाहनचालक आणि शेतकरी मोठ्या अडचणीत सापडले आहेत. अश्यात विजय वडेट्टीवार यांनी राज्यातील वाढत्या इंधन टंचाईच्या पार्श्वभूमीवर केंद्र आणि राज्य सरकारवर जोरदार निशाणा साधला आहे.
याच परिस्थितीवर भाष्य करताना वडेट्टीवार यांनी धक्कादायक अंदाज व्यक्त केला. “पुढील एक ते दीड महिन्यात पेट्रोलचा दर १५० रुपये तर डिझेलचा दर १७० रुपये प्रतिलिटरपर्यंत जाऊ शकतो,” असा दावा त्यांनी केला. देशातील आर्थिक परिस्थिती आणि सरकारच्या धोरणांवर टीका करताना त्यांनी म्हटलं की, “ज्या पद्धतीने देश चालवला जात आहे, त्यावरून देशाला खड्ड्यात घालण्याचं काम सुरू आहे. सर्वसामान्य आणि मध्यमवर्गीय माणूस आर्थिकदृष्ट्या उद्ध्वस्त होत आहे.”
सरकारकडून इंधन तुटवडा नसल्याचा दावा केला जात असताना प्रत्यक्ष परिस्थिती मात्र वेगळी असल्याचंही त्यांनी नमूद केलं. “केंद्रीय मंत्री आणि सरकार सातत्याने तुटवडा नसल्याचं सांगत आहेत. मग पेट्रोल पंपांवर डिझेल देताना वाहनाचं आरसी बुक का तपासलं जात आहे?” असा सवाल त्यांनी उपस्थित केला. विशेषतः शेतकऱ्यांना ट्रॅक्टरसाठी डिझेल घेताना कागदपत्रांची तपासणी केली जात असल्याने परिस्थिती गंभीर असल्याचा आरोप त्यांनी केला.
राज्यातील ग्रामीण भागात या टंचाईचा सर्वाधिक परिणाम जाणवत आहे. शेतीची कामे, मालवाहतूक आणि सार्वजनिक वाहतूक यावर परिणाम होत असून, अनेक ठिकाणी नागरिकांना तासन्तास रांगेत उभं राहावं लागत आहे. वाढत्या इंधन दरांमुळे महागाई आणखी वाढण्याची भीती व्यक्त केली जात आहे. वाहतूक खर्च वाढल्याने जीवनावश्यक वस्तूंचे दरही वाढू शकतात, अशी चिंता नागरिक व्यक्त करत आहेत.
दरम्यान, सरकारकडून परिस्थिती नियंत्रणात असल्याचा दावा केला जात असला तरी विरोधकांनी या मुद्द्यावरून सरकारला घेरण्यास सुरुवात केली आहे. आगामी काळात इंधन दरवाढ आणि टंचाईचा मुद्दा राज्याच्या राजकारणात अधिक तापण्याची शक्यता आहे.
