१ मे पासून सर्व प्रकारच्या रासायनिक खतांची खरेदी बंद

मोरगाव ता. रावेर, लोकशाही न्यूज नेटवर्क 

गेल्या काही वर्षापासून रासायनिक खते बनविणाऱ्या व विक्री करणाऱ्या काही कंपन्या विनाकारण काही कॉम्प्लेक्स खतांवर किंवा युरीया, पोटॅश यासारख्या मागणी असलेल्या रासायनिक खतांवर त्यांच्या इतर उत्पादनाची सक्ती किंवा लिंकींग करून होलसेल विक्रेता यांना देतात. तेच होलसेल विक्रेते खाली किरकोळ विक्रेत्यांना याच प्रमाणे खते विक्री करतात. आणि किरकोळ विक्रेता मग या सर्व प्रकारामध्ये भरडला जातो.

शेतकरी जेव्हा युरीया किंवा डि. ए. पी. खत घ्यायला किरकोळ दुकानात जातो तेव्हा तो किरकोळ दुकानदार त्याला त्या खतासोबत आलेले लिंकींग खत घेण्यासाठी आग्रह करतो. परंतु शेतकरी ते लिंकींग आलेले खत घ्यायला तयार नसतो व उगाचच त्या किरकोळ दुकानदाराची व शेतकऱ्यांची तू तू मै मै होत असते व एवढ्या वर्षांपासून त्यांचे असलेले जिव्हाळ्याचे संबंध बिघडतात. एखाद्या किरकोळ दुकानदाराने जर विना लिंकींग खत द्यायचे म्हटले तर त्याला जे लिंकींग खत आलेले आहे. ते तसेच पडून राहते त्यामुळे आर्थिक नुकसान होत असते.

अशी एक ना अनेक उदाहरण लिंकींग खताबद्दल व किरकोळ दुकानदाराबद्दल देता येतील. या सर्व गोष्टींपासून सुटका व्हावी व कायमस्वरूपी लिंकींगचा प्रश्न सुटावा म्हणून संपूर्ण महाराष्ट्रातील जिल्हा संघटनांनी माफदा संघटनेला पाठिंबा दर्शविलेला आहे. म्हणून दि. 1 मे 2025 पासून संपूर्ण महाराष्ट्रात सर्व प्रकारच्या रासायनिक खतांची खरेदी बंदचा निर्णय माफदा संघटनेतर्फे घेण्यात आला आहे. तसेच जोपर्यंत लिंकींगचा प्रश्न सुटत नाही तोपर्यंत आम्ही कोणताही होलसेल व किरकोळ विक्रेता रासायनिक खतांची खरेदी करणार नाही, असे एका किरकोळ दुकानदाराने नांव न छापण्याच्या अटीवर आमच्या प्रतिनिधींना सांगितले.