जळगाव, लोकशाही न्यूज नेटवर्क
महाराष्ट्राच्या आणि विशेषतः उत्तर महाराष्ट्राच्या राजकारणातील दोन कट्टर विरोधक म्हणून ओळखले जाणारे राष्ट्रवादी शरदचंद्र पवार पक्षाचे आमदार एकनाथराव खडसे आणि भाजपचे नेते आणि मंत्री गिरीश महाजन यांच्यात नव्या राजकीय समीकरणांची नांदी पाहायला मिळत आहे. एकनाथराव खडसे यांच्या अमृत महोत्सवी वर्षानिमित्त आयोजित कार्यक्रमाचे निमंत्रण देण्यासाठी खडसेंच्या स्वीय सहाय्यकांनी थेट गिरीश महाजन यांचे घर गाठले. या सोहळ्याला उपस्थित राहण्यास मंत्री महाजन यांनी होकार दिला आहे.
काही दिवसांपूर्वीच एकनाथ खडसे यांनी मी दिल्लीला गेलो होतो. अमित शाह यांनी मला फोन करून बोलावले होते. अमित शाह यांनी मला सांगितले की, भाजप जॉईन करो, असा दावा केला होता. त्यानंतर आता महाजनांशी मैत्रीचा हात पुढे केल्याने खडसेंच्या भाजपमधील घरवापसीची ही तयारी तर नाही ना? अशी शंका उपस्थित केली जात आहे. एकनाथ खडसे यांचे स्वीय सहाय्यक योगेश कोलते आणि प्रा. डॉ. सुनील नेवे यांनी जामनेर येथे मंत्री गिरीश महाजन यांच्या निवासस्थानी जाऊन त्यांची भेट घेतली आणि अमृत महोत्सवी कार्यक्रमाची निमंत्रण पत्रिका सुपूर्द केली.
खडसेंच्या दोन्ही सहाय्यकांनी अत्यंत आदराने हात जोडून, मंत्री महाजन यांनी या सोहळ्याला आवर्जून उपस्थित राहावे, अशी विनंती केली. त्यावर सुरुवातीला प्रतिक्रिया देताना महाजन मिश्किलपणे म्हणाले, सगळ्यांचा विषय वेगळा आणि माझा विषय वेगळा आहे. भेटीदरम्यान खडसेंच्या सहाय्यकांनी महाजनांना सांगितले की, या सोहळ्याला सर्वपक्षीय नेते उपस्थित राहणार आहेत, त्यामुळे तुम्हीही यावे. मंत्री महाजन यांनी संपूर्ण निमंत्रण पत्रिका उघडून अत्यंत बारकाईने न्याहाळली. विशेष म्हणजे, त्यांनी हसतमुखाने मान डोलवत कार्यक्रमाला येण्याबाबत प्रतिसाद दिला.
राजकीय वितुष्ट संपणार?
गेल्या अनेक वर्षांपासून जळगावच्या स्थानिक राजकारणात एकनाथ खडसे आणि गिरीश महाजन यांच्यात टोकाचे राजकीय युद्ध पाहायला मिळाले आहे. एकमेकांवर गंभीर आरोप-प्रत्यारोप करण्याची एकही संधी या दोन्ही नेत्यांनी सोडलेली नाही. अशा परिस्थितीत एकनाथ खडसेंनी पुढाकार घेत आपल्या खास दूतांना महाजनांच्या घरी पाठवल्याने राजकीय वर्तुळात चर्चांना उधाण आले आहे. आता एकनाथ खडसेंच्या अमृत महोत्सवी वर्षानिमित्त आयोजित कार्यक्रमात गिरीश महाजन उपस्थित राहणार का? हे पाहणे महत्त्वाचे ठरणार आहे.
