लोकशाही न्यूज नेटवर्क
शहापूर-मुरबाड मार्गावरील शेंद्रुण परिसरात सोमवारी पहाटेच्या सुमारास १६ प्रवाशांना घेऊन जाणाऱ्या मिनी बसचा भीषण अपघात झाला. या अपघातात बस चालकाचा जागीच मृत्यू झाला असून तीन प्रवासी गंभीर जखमी झाले आहेत. तर इतर प्रवाशांना किरकोळ दुखापती झाल्या असून त्यांच्यावर उपचार सुरु आहेत.
मिळालेल्या माहितीनुसार, मिनी बसमधून एकूण १६ प्रवासी प्रवास करत होते. हे सर्व प्रवासी नाशिक जिल्ह्यातील रहिवासी असून अलिबाग येथून नाशिककडे परतत होते. पहाटेच्या वेळी बस शहापूर-मुरबाड रस्त्यावरून जात असताना शेंद्रुण येथील धोकादायक वळणावर चालकाचे वाहनावरील नियंत्रण सुटले. त्यामुळे बस रस्त्याच्या कडेला खाली उतरली आणि भीषण अपघात झाला.
या अपघातात बस चालक प्रभाकर गांगुर्डे यांचा जागीच मृत्यू झाला. अपघाताची माहिती मिळताच स्थानिक नागरिक, पोलिस आणि आपत्कालीन यंत्रणा घटनास्थळी दाखल झाल्या. जखमी प्रवाशांना तातडीने बाहेर काढून उपचारासाठी रुग्णालयात हलवण्यात आले. अपघातात अश्विनी आकाश काळे (वय 27), पल्लवी वाल्मीक काठावटिक (वय 28) आणि कैलास हेमंत गायकवाड (वय 22) हे गंभीर जखमी झाले आहेत. त्यांच्यावर शहापूर उपजिल्हा रुग्णालयात उपचार सुरू आहेत. तर इतर किरकोळ जखमी प्रवाशांवर शेंद्रुण प्राथमिक आरोग्य केंद्रात प्राथमिक उपचार करण्यात आले.
अपघातामुळे काही काळ या मार्गावरील वाहतुकीवर परिणाम झाला होता. पोलिसांनी घटनास्थळी पंचनामा करून अपघाताची नोंद घेतली आहे. प्राथमिक तपासात चालकाचे वाहनावरील नियंत्रण सुटल्यामुळे हा अपघात झाल्याचे समोर आले आहे. या दुर्दैवी घटनेमुळे नाशिकमधील संबंधित कुटुंबांवर शोककळा पसरली असून परिसरात हळहळ व्यक्त केली जात आहे.
