भद्रावती, लोकशाही न्यूज नेटवर्क
शहरातील वाढत्या वाहतूक कोंडीच्या समस्येवर कायमस्वरूपी तोडगा काढण्यासाठी नगर परिषद भद्रावतीचे अध्यक्ष प्रफुल चटकी यांच्या नेतृत्वाखाली तहसीलदार भद्रावती यांना निवेदन सादर करण्यात आले. मोझा-भद्रावती, चिचोर्डी व केमुर्ली शिवारातील रामटेके रॉयल डेपो ते कोल्हटकर यांचे शेत, तेथून बालाजी वॉटर पार्क मार्गे केमुर्ली रस्त्यापर्यंतचा ८० फूट रुंदीचा शिवार रस्ता मोकळा करून वाहतुकीसाठी उपलब्ध करून देण्याची मागणी यावेळी करण्यात आली.
निवेदनात नमूद करण्यात आले आहे की, सदर शिवार रस्ता सध्या वापरात नसल्याने केमुर्ली व चिचोर्डीकडे जाणारी जड वाहने भद्रावती शहरातूनच मार्गक्रमण करतात. त्यामुळे मुख्य बाजारपेठ, मेडिकल चौक, मेन मार्केट, बसस्थानक परिसर आणि इतर प्रमुख मार्गांवर मोठ्या प्रमाणात वाहतूक कोंडी निर्माण होत आहे. हा शिवार रस्ता वाहतुकीसाठी खुला झाल्यास शहरातील वाहतुकीचा ताण मोठ्या प्रमाणात कमी होऊन नागरिकांना दिलासा मिळणार आहे.
तसेच चंद्रपूर-नागपूर महामार्गावरील मानोरा फाटा परिसरातून येणाऱ्या जड वाहनांसाठी हा पर्यायी मार्ग उपलब्ध झाल्यास शहरातील मुख्य रस्त्यांवरील गर्दी कमी होऊन वाहतूक सुरळीत होण्यास मदत होईल, असे निवेदनात नमूद करण्यात आले आहे. यावेळी नगर परिषद अध्यक्ष प्रफुल चटकी, विविध नगरसेवक, तसेच अनेक सामाजिक कार्यकर्ते उपस्थित होते. तहसीलदारांनी निवेदन स्वीकारून प्रकरणाची योग्य ती दखल घेण्याचे आश्वासन दिल्याची माहिती देण्यात आली.
