जळगावमध्ये हॉटेल चालकाला मद्यपींकडून मारहाण !
जळगाव ;– शहरातील गेंदालाल मिल परिसरात एका हॉटेल चालकावर दारूच्या नशेत असलेल्या चौघांनी हल्ला चढवल्याची घटना घडली आहे. हॉटेलमध्ये गोंधळ घालणाऱ्या या चौघांना समजवण्याचा प्रयत्न हॉटेल चालकाने केला असता, त्यांनी त्याच्यावरच हात उचलला. याप्रकरणी शहर पोलिस ठाण्यात गुन्हा दाखल करण्यात आला आहे.
शेख शाहरुख शेख गणी (वय २९, रा. गेंदालाल मिल परिसर) यांचे गेंदालाल मिल परिसरात हॉटेल आहे. १६ मार्च रोजी आदेश, सोन्या, आवेश आणि त्यांचा एक साथीदार असे चौघे हॉटेलमध्ये आले. दारूच्या नशेत त्यांनी मोठमोठ्याने आरडाओरडा आणि शिवीगाळ करण्यास सुरुवात केली.
शेख यांच्या आईने त्यांना शांततेत जेवण करण्यास सांगितले, परंतु त्यांनी ऐकण्यास नकार दिला. अखेर, शेख स्वतः त्यांना समजवण्यास गेले, त्याच वेळी या चौघांनी हॉटेल चालकावरच हल्ला चढवला आणि मारहाण केली.
या प्रकारामुळे हॉटेल परिसरात भीतीचे वातावरण पसरले. हॉटेल चालक शेख यांनी तत्काळ शहर पोलीस ठाण्यात धाव घेऊन तक्रार दाखल केली. पोलिसांनी आरोपी आदेश, सोन्या, आवेश आणि त्यांच्या साथीदाराविरुद्ध गुन्हा दाखल केला आहे.
या घटनेनंतर पोलिसांनी चौकशी सुरू केली असून आरोपींविरोधात कठोर कारवाई होणार असल्याचे संकेत दिले आहेत. जळगावमध्ये वाढत्या असभ्य वर्तनाच्या घटनांमुळे नागरिकांमध्ये चिंता वाढली आहे.
