ट्रान्सफार्मर बंद पडल्याच्या कारणावरून अभियंत्याला मारहाण ; आरोपीविरुद्ध गुन्हा दाखल
जळगाव;- महावितरणच्या कनिष्ठ अभियंत्यासोबत हुज्जत घालत मारहाण केल्याची घटना मोहाडी गावात घडली. अभियंता जयेंद्र सपकाळे (वय २९, रा. शास्त्रीनगर) यांना सुनिल पितांबर ठाकरे (रा. मोहाडी) याने शिवीगाळ करत चार-पाच वेळा कानशिलात लगावल्याचा प्रकार समोर आला आहे. ही घटना मोहाडी गव्हाण पाडा येथे दुपारी ३.४५ वाजता घडली.
महावितरणच्या कनिष्ठ अभियंता जयेंद्र सपकाळे आणि कंत्राटी कर्मचारी योगेश नाना ठाकरे (रा. कुरंगी, ता. पाचोरा) हे मोहाडी गावात वीज बिल वसुलीसाठी गेले होते. यावेळी सुनिल ठाकरे याने फोनवर ट्रान्सफार्मर बंद असल्याची तक्रार केली. अभियंत्याने “नवीन ट्रान्सफार्मर प्राप्त होताच जोडला जाईल” असे उत्तर दिले. यावर सुनिल ठाकरेने “कसा काम करतोस?” असे म्हणत शिवीगाळ करण्यास सुरुवात केली.
थोड्याच वेळात सुनिल ठाकरे घटनास्थळी आला आणि सपकाळे यांची कॉलर पकडून त्यांना मारहाण केली. तसेच, “तू आमच्या गावात कसा काम करतोस, तुझी नोकरीच काढतो!” असे धमकावत जीवे मारण्याची धमकी दिली.
या हल्ल्यात अभियंता जयेंद्र सपकाळे जखमी झाले असून, त्यांनी तातडीने एमआयडीसी पोलिस ठाण्यात धाव घेत तक्रार दाखल केली. सुनिल पितांबर ठाकरे याच्यावर शासकीय कामात अडथळा आणल्याचा गुन्हा दाखल करण्यात आला आहे.
