लोकशाही न्यूज नेटवर्क
मुंबईतून मोठी बातमी समोर आली आहे. मध्य रेल्वेच्या मुलुंड स्थानकावर एसी लोकलचा AC 15 मिनिटांपासून बंद पडला होता, त्यामुळे अनेक प्रवासी गुदमरले असल्याचे समोर आले होते. यात अनेक महिला प्रवासी बेशुद्ध पडल्याचे समोर आले आहे. सोमवारी सकाळी गर्दीच्या वेळेत मुंबईतील एसी लोकल ट्रेनमध्ये तांत्रिक बिघाड झाल्याने AC यंत्रणा अचानक बंद पडल्याने मुलुंड स्थानकावर ट्रेन थांबलेली असताना डब्यांतील प्रवाशांना श्वास घेण्यास त्रास झाला. या घटनेत एका प्रवाशाला उपचारासाठी रुग्णालयात दाखल करावे लागले होते.
समोर आलेल्या माहितीनुसार ही घटना सकाळी 9.26 वाजता घडली. सकाळी 8.33 वाजता टिटवाळा-सीएसएमटी एसी लोकल मुलुंड स्थानकाच्या प्लॅटफॉर्म क्रमांक 2 वर उभी असताना तिच्या एसी यंत्रणेत बिघाड झाला. जवळपास 15 मिनिटे एसी बंद असल्याने गर्दीने भरलेल्या डब्यांतील तापमान झपाट्याने वाढले. सामान्य लोकलच्या तुलनेत एसी लोकलचे दरवाजे लॉक असतात आणि प्रवाशांना ते हाताने उघडता येत नाहीत. एसी बंद झाल्यामुळे हवा खेळती न राहिल्यामुळे अनेक प्रवाशांना गुदमरल्यासारखे वाटू लागले.
रेल्वे अधिकाऱ्यांनी दिलेल्या माहितीनुसार, तीन प्रवाशांनी श्वास घेण्यास त्रास होत असल्याची तक्रार केली, त्यानंतर त्यांना वैद्यकीय मदत देण्यात आली. मात्र फहीम अन्सारी या प्रवाशाला जवळच्या रुग्णालयात उपचारासाठी दाखल करण्यात आले. इतर दोघांची प्रकृती सुधारल्यानंतर त्यांना घरी सोडण्यात आले. या घटनेचा व्हिडिओ सोशल मीडियावर व्हायरल होत आहे. यात रेल्वे कर्मचारी आणि सहप्रवासी त्रास होत असलेल्या प्रवाशांना मदत करताना दिसत आहेत.
मध्यरेल्वेचे जनसंपर्क अधिकारी स्वप्नील नीला यांनी या घटनेबाबत सांगितले की, टिटवाळ्याहून सीएसएमटी कडे जाणारी 8:53 च्या एसी लोकलमधील कोचमध्ये तांत्रिक बिघाड झाला होता. कोच मधील 3 प्रवाशांना श्वास घेण्यासाठी त्रास झाला होता, आता परिस्थिती सगळी नॉर्मल आहे. ज्या एसी लोकलमधे तांत्रिक बिघाड झाला होता, ती लोकल कुर्ला स्थानकावरून डिस्चार्ज करण्यात आली आहे. असा एसीचा तांत्रिक बिघाड कोचमध्ये पुन्हा होऊ नये यासाठी तांत्रिकदृष्ट्या आम्ही अधिक काळजी घेऊ. सध्या मध्य रेल्वेवरील सर्व लोकल सेवा या वेळेवर सुरळीत सुरू आहेत.
