कोकाटेंच्या शिक्षेला उच्च न्यायालयाची स्थगिती
एक लाखांच्या वैयक्तिक हमीवर जामीन मंजूर ; दोषसिद्धी मात्र कायम
मुंबई : बनावट कागदपत्रे व फसवणूक प्रकरणात दोषी ठरविण्यात आलेले राष्ट्रवादी काँग्रेस (अजित पवार गट) चे नेते व माजी मंत्री अॅड. माणिकराव कोकाटे यांना मुंबई उच्च न्यायालयाने मोठा दिलासा दिला आहे. नाशिक सत्र न्यायालयाने सुनावलेली दोन वर्षांची शिक्षा उच्च न्यायालयाने स्थगित केली असून, एक लाख रुपयांच्या वैयक्तिक हमीवर त्यांना जामीन मंजूर करण्यात आला आहे. मात्र, या प्रकरणातील दोषसिद्धीला स्थगिती देण्यास न्यायालयाने स्पष्ट नकार दिला आहे.
कोकाटेंवर उत्पन्नाबाबत खोटी प्रतिज्ञापत्रे सादर करून आर्थिकदृष्ट्या दुर्बळ घटकांसाठी (EWS) असलेल्या शासकीय योजनेअंतर्गत सदनिका मिळविल्याचा आरोप आहे. या प्रकरणात त्यांना दोषी ठरवून नाशिक सत्र न्यायालयाने दोन वर्षांची शिक्षा सुनावली होती. त्या निर्णयाविरोधात कोकाटेंनी उच्च न्यायालयात अपील दाखल केले होते.
या अपीलवर सुनावणी करताना न्यायमूर्ती आर. एन. लढ्ढा यांच्या एकलपीठाने प्रथमदर्शनी उपलब्ध पुरावे लक्षात घेता कोकाटेंचा या प्रकरणातील सहभाग दिसून येतो, असे निरीक्षण नोंदवले. त्यामुळे दोषसिद्धी कायम ठेवत शिक्षेला स्थगिती देण्यात आली. शिक्षेवर स्थगिती दिल्याने कोकाटेंना तात्पुरता दिलासा मिळाला असला, तरी दोषसिद्धी कायम राहिल्याने त्यांच्या राजकीय व कायदेशीर अडचणी पूर्णतः संपलेल्या नाहीत.
या निर्णयामुळे राज्याच्या राजकारणात चर्चांना उधाण आले असून, पुढील सुनावणी व अंतिम निकालाकडे सर्वांचे लक्ष लागले आहे.
