महिलेच्या पर्समधून १२ लाखांचे दागिने, रोकड लंपास

महाराष्ट्र एक्सप्रेसमधील घटना : गुन्ह्याची नोंद

0

जळगाव, लोकशाही न्यूज नेटवर्क

पुणे येथील नातेवाईकांकडे आयोजित कार्यक्रम आटोपून बडनेरा जि. अमरावती येथील घराकडे परत जात असताना, महाराष्ट्र एक्सप्रेसमधून प्रवास करणाऱ्या एका महिलेच्या पर्समधून 11 लाख 95 हजार रुपयांचे सोन्याचे दागिने आणि 10 हजार रुपयांची रोख रक्कम चोरट्याने चोरल्याची घटना 31 जानेवारी 2025 रोजी घडली. ही घटना पाचोरा स्टेशनजवळ घडली, ज्यामुळे लोहमार्ग पोलिसांनी अज्ञात चोरट्याविरुद्ध गुन्हा दाखल केला आहे.

फिर्यादी महिलेचे नाव संध्या चंद्रकांत राठी (69, रा. अमरावती) आहे. त्या पुणे येथे आयोजित एका कुटुंबीय कार्यक्रमाला त्यांच्या पती डॉ. चंद्रकांत राठी आणि इतर दोन नातेवाईकांसह गेल्या होत्या. कार्यक्रम संपल्यावर त्या 31 जानेवारी रोजी रात्री महाराष्ट्र एक्सप्रेसने बडनेरा मार्गे घरी परतत होत्या. प्रवासाच्या दरम्यान संध्या राठी यांनी आपल्या पर्समध्ये 3 चैन, 2 तोळ्याच्या 2 सोन्याच्या चैन, डायमंड मंगळसूत्र, 8 तोळ्यांचे सोन्याचे झुमके, 5 ग्रॅमचे टॉप्स आणि 10 हजार रुपयांची रोख रक्कम एका बॉक्समध्ये ठेवली होती.

झोपेच्या वेळी पर्स त्यांनी स्वत:च्या जवळ ठेवली. पण सकाळी पाचोरा स्थानकाजवळ उठल्यावर त्यांना पर्समधून दागिने आणि रोकड गायब आढळली. त्यावेळी त्यांनी आजूबाजूला शोध घेतला, पण ते सापडले नाहीत. त्यानंतर संध्या राठी यांनी रेल्वेच्या टोल फ्री क्रमांकावर तक्रार नोंदवली. त्यानंतर रेल्वे नियंत्रण कक्षाकडून रेल्वे पोलिसांना माहिती मिळाल्यावर जळगाव स्थानकावर पोहोचल्यावर पोलिसांनी तक्रार नोंदवून घेतली. लोहमार्ग पोलिसांनी या प्रकरणी अज्ञात चोरट्याविरुद्ध गुन्हा दाखल केला आहे आणि चोराच्या शोधासाठी तपास सुरू केला आहे.

Leave A Reply

Your email address will not be published.