मुंबई, लोकशाही न्यूज नेटवर्क
मतदान झाल्यानंतर सोमवारी काही मिनिटांत आलेल्या एका फोनने मतदारांना चक्रावून सोडले आहे. संगणकीय प्रणालीच्या माध्यमातून करण्यात आलेल्या या फोनने मतदारांना त्यांनी कोणत्या पक्षाला मतदान केले हे विचारत पर्याय सांगून त्यानुसार मोबाइल फोनवरील अंक दाबण्यास सांगण्यात येत होते. मतदारांचा कल जाणून घेण्याचा आटापिटा नेमके कोण करत आहे, याची जोरदार चर्चा मतदारांत रंगली असून याविरोधात राजकीय पक्ष तक्रार करण्याच्याही तयारीत असल्याचे कळते.
मतदान झाल्यानंतर नेमके मतदान कोणाला केले याविषयी नाक्यानाक्यावर, कार्यालयात आणि ऑफिसात चर्चा रंगते. परंतु सोमवारी पार पडलेल्या मतदानानंतर एक वेगळाच प्रकार मतदारांना अनुभवायला मिळाला. अनेक मतदारांना त्यांच्या फोनवर +91 186-5031889 या क्रमांकावरून फोन आला. संगणकीय प्रणालीच्या माध्यमातून करण्यात आलेल्या या फोनच्या माध्यमातून मतदारांना कोणत्या पक्षाला मतदान केले असे थेट विचारण्यात आले. तसेच, ज्या पक्षाला मतदान केले त्याचे उत्तर देण्यासाठी फोनवरील 1 ते 4 असे क्रमांकाचे बटण दाबून उत्तर देण्यासही सांगण्यात आले.
मतदारांना आलेला या फोनचे कॉलर आयडी पतियाळा, पंजाब असे दिसून येत असले तरी अनेक मोबाइल धारकांनी त्याला स्पॅम रिपोर्ट केल्याचेही निदर्शनास आले. मी सहसा अनोळखी क्रमांकावरून आलेल्या फोनला उत्तर देत नाही, परंतु मी घाईगडबडीत तो फोन उचलला. त्यावेळी समोरून महिलेच्या आवाजात तुम्ही कुणाला मतदान केले असा थेट प्रश्न विचारण्यात आला, मी पुढे ऐकले असता एक-एक करत सर्व पक्षांची नावे घेऊन उत्तर देण्यास सांगण्यात आले, हे खूपच चक्रावून सोडणारे होते, अशी माहिती एका वाचकाने नाव उघड न करण्याच्या अटीवर दिली.
याविषयी राजकीय पक्षांकडूनही चिंता व्यक्त करण्यात आली असून अशाप्रकारे नेमके कोण सर्वेक्षण करून घेत आहे, असा प्रश्न एका राजकीय नेत्याने विचारला. याविषयी पक्षांतर्गत चर्चा करून याची तक्रार निवडणूक आयोगाकडे करण्यात येईल, असेही नेत्याने स्पष्ट केले.
