कोल्हापूर, लोकशाही न्यूज नेटवर्क
राज्यातील पोलिस आणि त्यांच्या कुटुंबीयांवर मोफत उपचार करण्यासाठी असलेल्या आरोग्य योजनेचे कोट्यवधी रुपये सरकारने थकवल्यामुळे पोलिसांवर उपचार करण्यास खासगी रुग्णालये नकार देत आहेत. ‘आधी बिले द्या, नंतर उपचारांचे बघू’ अशी भूमिका डॉक्टर घेत असल्याचे समोर आले आहे. पोलिस व त्याच्या कुटुंबीयांना उपचारांसाठी दाखल करून घेण्यास थेट नकार दिला जात आहे. याचा फटका पोलिस कुटुंबीयांना बसत आहे. लाडकी बहीण योजनेमुळे सरकारची तिजोरी रिकामी होत असल्याने इतर योजनांचे पैसे रखडत आहेत. पोलिसांची आरोग्य योजनाही यामुळे अडचणीत आली आहे.
निवडणुक काळात विजयासाठी महायुती सरकारने ‘लाडकी बहीण’ योजनेचे शस्त्र वापरले खरे, पण तेच आता सरकारच्या पथ्यावर पडल्याचे दिसत आहे. पुढील पाच वर्ष लाडक्या बहिणींना दरमहा रक्कम देण्याकरिता सरकार इतर योजनांना पैसे पुरवण्यात काटछाट करत आहे. अर्थात सर्वसामान्य जनतेला तर याचा तोटा सहन करावा लागणारच आहे. पण शासनाचे कर्मचारिही यातून सुटले नाहीत. सर्वसामान्य व्यक्तींना मोफत उपचारांसाठीच्या महात्मा फुले आरोग्य योजनेच्या धर्तीवर पोलिस आणि त्यांच्या कुटुंबीयांना मोफत उपचार मिळण्यासाठी महाराष्ट्र पोलिस कुटुंब आरोग्य योजना सुरू करण्यात आली आहे. राज्यातील अनेक रुग्णालयांची या योजनेत नोंदणी करण्यात आली आहे. सध्या राज्यात अडीच लाखांवर पोलिस आहेत. गेल्या दोन वर्षांत यातील अनेकांच्या कुटुंबीयांवर आरोग्य योजनेत विविध रुग्णालयांत उपचार करण्यात आले; पण त्यांची बिले देण्यास सरकार टाळाटाळ करीत असल्याची डॉक्टरांची तक्रार आहे.
डॉक्टरांकडून थेट नकार !
बिलासाठी हेलपाटे मारून रुग्णालय प्रशासन थकले; पण बिलच मिळत नसल्याने पोलिस आणि त्यांच्या कुटुंबीयांना आरोग्य योजनेत उपचार करण्यास डॉक्टर थेट नकार देत आहेत. याबाबत एका डॉक्टरांशी संपर्क साधला असता ते म्हणाले, ‘महात्मा फुले योजनेचे कोट्यवधी रुपये आम्हाला मिळालेले नाहीत. पोलिस आरोग्य योजनेची बिले मिळावीत म्हणून वर्षभर हेलपाटे मारीत आहोत; पण ती देण्याबाबत काहीच हालचाली दिसत नाहीत. यामुळे रुग्ण दाखल करून घेणे बंद केले आहे.
