शेतकऱ्यांसाठी दिलासा : किसान क्रेडिट कार्ड योजनेतून ४ टक्के व्याजदराने ५ लाखांपर्यंत कर्ज
मुबई I लोकशाही न्यूज नेटवर्क
शेतकऱ्यांचे उत्पन्न दुप्पट व्हावे, यासाठी केंद्र व राज्य सरकारकडून विविध योजना राबवल्या जात आहेत. यामधील महत्त्वाची योजना म्हणजे किसान क्रेडिट कार्ड (KCC) योजना. या योजनेत शेतकऱ्यांना केवळ ४ टक्के व्याजदराने पाच लाखांपर्यंत कर्ज मिळू शकते. या कर्जाचा उपयोग शेतीसाठी लागणारी उपकरणे खरेदी करण्यासोबतच पशुपालन, दुग्ध व्यवसाय व मत्स्यपालन यांसारख्या कृषी व्यवसायासाठी करता येतो.
योजनेचा उद्देश
सावकारांच्या जाचातून शेतकऱ्यांना मुक्त करून कमी व्याजदरात कर्ज उपलब्ध करून देणे हा या योजनेचा मुख्य उद्देश आहे. मागील ११ वर्षांपासून देशभरातील कोट्यवधी शेतकऱ्यांसाठी ही योजना आधार ठरत आहे. शेतकऱ्यांना दिले जाणारे कार्ड एटीएमसारखे कार्य करते. बँकेने ठरवलेल्या मर्यादेत कधीही पैसे काढता येतात. विशेष म्हणजे व्याज फक्त काढलेल्या रकमेवरच आकारले जाते. साधारण व्याजदर ७ टक्के आहे; मात्र वेळेवर परतफेड केल्यास सरकार ३ टक्के व्याज सवलत देते आणि त्यामुळे प्रभावी व्याजदर फक्त ४ टक्के राहतो.
गहाण व फीपासून सवलत
कृषी मंत्रालयाच्या माहितीनुसार, दोन लाख रुपयांपर्यंतचे कर्ज जमीन गहाण न ठेवता मिळते, तर जमिनीच्या हमीवर तीन लाखांपर्यंतचे कर्ज दिले जाते. यासाठी कोणतेही प्रोसेसिंग शुल्क आकारले जात नाही. तसेच पिक विम्याचे संरक्षण मिळते. कर्जाची मुदत पाच वर्षांची असून दरवर्षी त्याचे नूतनीकरण करावे लागते.
आवश्यक कागदपत्रे
आधार कार्ड
जमिनीचे कागदपत्र
बँक पासबुक
अर्ज प्रक्रिया
या योजनेचा लाभ घेण्यासाठी शेतकरी जवळच्या बँक शाखेत जाऊन अर्ज करू शकतात. ऑनलाइन अर्जासाठी संबंधित बँकेच्या संकेतस्थळावर जाऊन किसान क्रेडिट कार्ड पर्याय निवडावा, अर्ज भरून सबमिट करावा. त्यानंतर अर्जाचा संदर्भ क्रमांक मिळतो व पात्र शेतकऱ्यांशी पाच दिवसांत बँकेकडून संपर्क साधला जातो. किसान क्रेडिट कार्ड योजना शेतकऱ्यांच्या शेती व संबंधित व्यवसायाला मोठे प्रोत्साहन देत असून त्यांचे आर्थिक स्वावलंबन मजबूत करण्यास महत्त्वाची ठरत आहे.
