मद्य घोटाळ्यात खटला चालविण्यास गृह मंत्रालयाची मंजुरी

केजरीवालांचा पाय खोलात : केजरीवालांचा सरकारला उपरोधिक टोला

0

नवी दिल्ली, लोकशाही न्यूज नेटवर्क 

दिल्लीतील मद्य धोरण घोटाळ्यातील मनी लाँडरिंग प्रकरणात केजरीवाल यांच्यावर खटला चालवण्यासाठी केंद्रीय गृह मंत्रालयाने बुधवारी सक्तवसुली महासंचालनालयाला (ईडी) परवानगी दिली. यावर, ‘ते अशा प्रकारे निवडणूक लढवत आहेत व आम्ही आमच्या पद्धतीने लढत आहोत,’ अशी उपरोधिक प्रतिक्रिया केजरीवाल यांनी दिली.

पाच फेब्रुवारी रोजी दिल्लीत होणाऱ्या विधानसभा निवडणुकांच्या तोंडावर ‘ईडी’ला केजरीवाल यांच्याविरुद्ध खटला चालवण्यास मुभा मिळाली आहे. नायब राज्यपाल विनय सक्सेना यांनीही केजरीवाल यांच्यावर खटला चालवण्याची परवानगी दिली आहे. गृह मंत्रालयाने उत्पादन शुल्क धोरणाशी संबंधित मनी लाँडरिंग प्रकरणात केजरीवाल यांच्यावर खटला चालवण्यास ईडीला मान्यता दिली आहे. गेल्या वर्षी या प्रकरणातच केजरीवाल यांना अटक करण्यात आली होती. ‘नोव्हेंबर 2022 पासून हे लोक काय करत होते,’ असा सवाल ‘आप’ने विचारला. ‘आम आदमी पक्षाच्या नेत्यांची बदनामी करा हे त्यांचे धोरण असले, तरी दिल्लीच्या जनतेला सर्व काही समजले आहे,’ असाही पलटवार ‘आप’ने केला.

सरकारी कर्मचाऱ्यांवर खटला चालवण्यासाठी हे करावे लागेल, असे सर्वोच्च न्यायालयाने म्हटले होते. त्यामुळे ‘ईडी’ला ही मान्यता घ्यावी लागली. ‘ईडी’ने गेल्या वर्षी पीएमएलए न्यायालयात केजरीवाल यांच्याविरुद्ध आरोपपत्र दाखल केले होते. यामध्ये केजरीवाल यांना दारू धोरण घोटाळ्यात मुख्य सूत्रधार म्हटले आहे. ईडीने केजरीवालांविरुद्ध सत्र न्यायालयात 9 जुलै रोजी सातवे आरोपपत्र दाखल केले होते. त्यांच्यावर खटला चालवण्यासाठी पुरेसे पुरावे आहेत, असे न्यायालयाने म्हटले होते. नंतर केजरीवाल यांनी सर्वोच्च न्यायालयात धाव घेतली. जिथे न्यायालयाने त्यांच्या बाजूने निकाल देताना म्हटले की खटला चालवण्यासाठी सरकारची परवानगी आवश्यक आहे. हा नियम सीबीआय आणि राज्य पोलिसांनाही लागू असेल. यानंतर ईडीने नायब राज्यपालांची परवानगी मागितली होती.

 

केजरीवाल यांचा उमेदवारी अर्ज दाखल

अरविंद केजरीवाल यांनी नवी दिल्ली विधानसभा मतदारसंघातून बुधवारी उमेदवारी अर्ज दाखल केला आहे. त्यापूर्वी केजरीवाल यांनी पत्नी सुनीता यांच्यासह पदयात्रा काढली; तसेच कॅनॉट प्लेसमधील प्राचीन हनुमान मंदिरात पूजा आरती आणि वाल्मिकी मंदिरात प्रार्थना केली. नवी दिल्ली मतदारसंघातून भाजपचे प्रवेश वर्मा आणि काँग्रेसचे संदीप दीक्षित यांच्याविरुद्ध केजरीवाल निवडणूक लढवत आहेत. केजरीवाल, मनीष सिसोदिया, प्रवेश वर्मा, रमेश बिधुडी, देवेंद्र यादव यांच्यासह आप, भाजप आणि काँग्रेसच्या अनेक वरिष्ठ नेत्यांनीही आज अर्ज दाखल केले आहेत. केजरीवाल यांचे प्रतिस्पर्धी प्रवेश वर्मा यांनीही वाल्मिकी मंदिरात पूजा केली.

Leave A Reply

Your email address will not be published.