जामनेरमध्ये वाहनात गॅस भरत असताना गॅसहंड्यांचे मोठे स्फोट
एक जण गंभीर जखमी, शेळीचा मृत्यू
जामनेर I लोकशाही न्युज नेटवर्क
वाहनात गॅस भरत असताना शहरातील बोदवड रस्त्यावर सकाळी नऊ ते दहा वाजेच्या सुमारास मोठा स्फोट झाला. या घटनेत एक व्यक्ती गंभीर जखमी झाला असून एका शेळीचा जागीच मृत्यू झाला आहे. अचानक झालेल्या या दुर्घटनेमुळे परिसरात एकच खळबळ उडाली.
मिळालेल्या माहितीनुसार, बोदवड रस्त्यावरील सलीम शेख यांच्या गॅरेजमध्ये अवैध गॅस रिफिलिंग सुरू असल्याचे समजते. सकाळच्या सुमारास वाहनांमध्ये गॅस भरत असताना गॅस लिकेज होऊन सात ते आठ गॅसहंड्यांचे मोठे स्फोट झाले. या स्फोटाच्या धक्क्याने ओमनी कार आणि दुचाकी जळून खाक झाल्या. तर एक व्यक्ती गंभीर जखमी झाला असून त्याला उपचारासाठी तातडीने रुग्णालयात हलविण्यात आले.
या दुर्घटनेत परिसरात असलेली एक शेळी होरपळून जागीच मृत झाली. घटनेनंतर नागरिकांनी तातडीने जामनेर नगरपालिकेच्या अग्निशमन दलाला पाचारण केले. तसेच जामनेर पोलीस ठाण्याचे अधिकारी व कर्मचारी घटनास्थळी दाखल झाले. पोलीस निरीक्षक मुरलीधर कासार यांनी स्वतः घटनास्थळी येऊन पाहणी करून माहिती घेतली.
हे गॅरेज मोकळ्या जागेत असल्यामुळे मोठी जीवितहानी टळली असल्याचे पोलिसांकडून सांगण्यात आले. घटनेची नोंद जामनेर पोलीस स्टेशनमध्ये सुरू आहे.
