जळगाव, लोकशाही न्यूज नेटवर्क
जळगावमधून एक धक्कादायक घटना समोर आलीय. शहरातील गणेश कॉलनीमध्ये राहणाऱ्या १५ वर्षीय मुलाने राहत्या घरात गळफास घेतला आहे. ओम पंडित चव्हाण असे मयत मुलाचे नाव आहे.
मिळालेल्या माहितीनुसार, जळगाव शहरातील गणेश कॉलनीमध्ये ओम पंडित चव्हाण हा आपल्या आई-वडील, बहीण आणि आजीसोबत वास्तव्याला होता, तो जळगाव शहरातील प्रोग्रेसिव्ह इंग्लिश मीडियम शाळेत नववीच्या वर्गात शिकत होता. सोमवारी २५ नोव्हेंबरला दुपारी ३च्या सुमारास त्याने गळफास लावून घेतला. त्याचे आई-वडील हे दवाखान्यात गेले होते तर आजी ही शेजारच्या घरात गेली होती. तेव्हा त्याने घरात गळफास लावून घेतला.
दरम्यान त्याचे आई-वडील हे दवाखान्यातून घरी परतल्यानंतर त्यांनी घराचा दरवाजा उघडण्याचा प्रयत्न केला. पण तो आतून बंद होता. नंतर वडिल पंडीत चव्हाण यांनी दरवाजा ठोठावला. मात्र आतून कोणताच प्रतिसाद मिळाला नाही. त्यामुळे त्यांनी घराच्या खिडकीतून डोकावून पाहिले असता त्यांच्या पायाखालची जमीनच सरकली.
आपल्या पोटच्या मुलाने गळफास घेतल्याचे पाहून आई-वडिलांनी एकच आक्रोश केला. त्याला नंतर तातडीने जिल्हा शासकीय वैद्यकीय महाविद्यालयात दाखल करण्यात आले. पण तेथे पोहाचताच वैद्यकीय अधिकारी यांनी मयत घोषित केले. मुलाच्या आत्महत्येचे कारण अद्याप समोर आलेले नाही. या घटनेबाबत जिल्हापेठ पोलीस ठाण्यात अकस्मात मृत्यूची नोंद करण्यात आली आहे.
