जळगाव | जळगावकरांसाठी आनंदाची बातमी समोर आली आहे. जळगाव विमानतळावरून आता देशाची राजधानी नवी दिल्लीसाठी व्यावसायिक विमानसेवा सुरू होत आहे. ‘अलायन्स एअर’च्या माध्यमातून इंदूरमार्गे ही सेवा १ मे ते ३१ मेदरम्यान प्रायोगिक तत्त्वावर चालवली जाणार असून, त्याचे अधिकृत वेळापत्रक विमानतळ प्रशासनाला प्राप्त झाले आहे. या सेवेमुळे जळगाव-इंदूर हवाई संपर्कालाही मोठी चालना मिळणार आहे.
सध्या जळगाव विमानतळावरून फ्लाय ९१ या कंपनीकडून गोवा, पुणे आणि हैदराबादसाठी उड्डाणे सुरू आहेत, तर ‘अलायन्स एअर’मार्फत मुंबई आणि अहमदाबादसाठी सेवा उपलब्ध आहे. आता दिल्लीसाठी थेट सेवा सुरू करण्याचे प्रयत्न यशस्वी ठरले असून, त्याचा शुभारंभ १ मेपासून होणार आहे.
रेल्वे किंवा रस्त्याने दिल्ली गाठण्यासाठी साधारण १८ ते २४ तासांचा कालावधी लागतो. मात्र, या नव्या विमानसेवेने हा प्रवास अवघ्या ३ तास १० मिनिटांत पूर्ण होणार आहे. तसेच, जळगावहून इंदूरला जाण्यासाठी सध्या ७ ते ८ तास लागतात, परंतु विमानाने केवळ ४० मिनिटांत हा प्रवास शक्य होणार आहे.
ही सेवा मंगळवार, गुरुवार आणि शनिवार या दिवशी उपलब्ध राहणार आहे. दिल्लीहून दुपारी ४.५० वाजता उड्डाण घेणारे विमान सायंकाळी ६.५० वाजता इंदूरला पोहोचेल आणि तेथून ७.१५ वाजता निघून रात्री ७.५५ वाजता जळगावला येईल. तसेच, जळगावहून रात्री ८.२० वाजता निघणारे विमान ९.०० वाजता इंदूरला पोहोचेल आणि तेथून ९.२५ वाजता उड्डाण घेऊन रात्री ११.३० वाजता दिल्लीला पोहोचेल. या नव्या सेवेने जळगाव–दिल्ली तसेच जळगाव–इंदूर दरम्यानच्या प्रवासाला गती मिळणार असून, प्रवाशांना मोठा दिलासा मिळणार आहे.
