जळगाव, लोकशाही न्यूज नेटवर्क
जळगाव तालुक्यातील मोहाडी गावात बेपत्ता झालेल्या १६ वर्षीय अल्पवयीन तरुणीचा मृतदेह गावातील ग्रामपंचायतीजवळ असलेल्या विहरीत आढळून आल्याची धक्कादायक घटना रविवारी 18 डिसेंबर रोजी दुपारी दीड वाजेच्या सुमारास उघडकीस आली आहे. पुजा भीमराव पवार (वय २६, रा. मोहाडी) असे मयत तरुणीचे नाव आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
पुजा भीमराव पवार ही तरुणी मोहाडी येथे परिवारासह राहत होती. १७ डिसेंबर रोजी मध्यरात्रीच्या सुमारास घरात सर्व जण झोपलेले असतांना तरुणी घरातून निघून गेली. दुसऱ्या दिवशी सकाळच्या सुमारास तरुणीचा सर्वत्र शोध घेतला मात्र ती सापडली नसल्याने कुटुंबियांनी एमआयडीसी पोलीसात तक्रार दिली. त्यानुसार अज्ञात व्यक्तीविरुद्ध अपहरणाचा गुन्हा दाखल करण्यात आला होता.
दरम्यान रविवारी दुपारी दीड वाजेच्या सुमारास गावातील ग्रामपंचायत जवळील विहरीमध्ये ग्रामस्थांना तरुणीचा मृतदेह पाण्यावर तरंगतांना दिसून आला. त्यांनी तात्काळ घटनेची माहिती एमआयडीसी पोलिसांना दिली. या घटनेची माहिती मिळताच एमआयडीसी पोलीस ठाण्याचे सहाय्यक पोलीस निरीक्षक अमोल मोरे, रतीलाल पवार, सुद्धोधन ढवळे, जितेंद्र राठोड यांनी घटनास्थळी धाव घेतली. त्यांनी गावकऱ्यांच्या मदतीने तरुणीचा मृतदेह विहरीतून बाहेर काढला.
यावेळी ही तरुणी गावातीलच असल्याने तिची ओळख पटविली. मृतदेह शासकीय वैद्यकीय महाविद्यालयात दाखल केला असता वैद्यकीय अधिकाऱ्यांनी मृतदेहाचे शवविच्छेदन केल्यानंतर नातेवाईकांच्या स्वाधीन करण्यात आला. याप्रकरणी एमआयडीसी पोलिसात अकस्मात मृत्यूची नोंद करण्यात आली आहे.
