जळगाव, लोकशाही न्यूज नेटवर्क
मोटारसायकली चोरून त्या विकणाऱ्या इसमास पोलिसांनी अटक केली आहे. यावल तालुक्यातील दहिगाव येथील 37 वर्षीय तरुणाने तब्बल अकरा मोटारसायकली पेक्षा जास्त जळगाव शहरासह ग्रामीण भागातून चोरी करून सावखेडा सिम दहिगाव भागात कमी दरात विक्री केली. याप्रकरणी पोलीसांना मिळालेल्या गुप्त माहितीनुसार जळगाव पोलिसांनी सापळा रचून आरोपीस ताब्यात घेत चौकशी 11 मोटरसायकली पोलिसांनी हस्तगत केल्या आहेत, जळगाव येथून चोरीस गेलेल्या मोटरसायकलीच्या तपासांती गुप्त खबरीनुसार जळगाव शहर पोलिसांनी दहिगाव गाठले.
दहिगावातील पटेल वाड्यात रहिवास असलेला आसिफ बशीर पटेल यास दिनांक ४ रोजी रात्री नऊ वाजेच्या सुमारास ताब्यात घेऊन चौकशी केली. चौकशी अंती त्याने चोरून आणलेल्या मोटारसायकली लोकांना कमी दरात विक्री केलेल्यांची नावे त्याने पोलिसांना सांगितले. पोलिसांनी त्वरित त्या नागरीकांच्या घरून मोटारसायकली ताब्यात घेतल्या. दिनांक ४ रोजी सहा मोटारसायकली तर दिनांक ५ रोजी दुपारी तीन वाजेची सुमारास पाच मोटारसायकली ताब्यात घेतल्या.
अशा एकूण ११ मोटरसायकली जळगाव पोलिसांनी जळगाव शहर पोलीस स्टेशनला जमा करण्यात आल्या असून आरोपीच्या माध्यमातून चोरीस गेलेल्या मोटारसायकलींची कसून चौकशी सुरू आहे.
आरोपी आसिफ हा गेल्या पाच ते सहा महिन्यापासून मोटार सायकली जळगाव भागातून चोरून दहिगाव सावखेडा सिम व ग्रामीण भागात विक्री करीत होता. चांगल्या परिस्थितीत असलेली मोटार सायकल आठ ते दहा हजार जास्तीत जास्त १५ हजारापर्यंत विक्री करीत होता. हे पोलिसांच्या निदर्शनास आले. त्याचप्रमाणे ज्यांनी मोटरसायकली ताब्यात दिल्यात. त्यांनी सुद्धा पोलिसांना याबाबतची माहिती दिली. या कामी जळगाव शहर पोलीस ठाण्याचे फौजदार राजू जाधव, पोलीस स्टेशन कॉन्स्टेबल सतीश पाटील, उमेश भांडारकर, राहुल पांचाळ, अमोल ठाकूर, होमगार्ड जनार्दन महाजन हे तपास करीत आहेत.
या प्रकरणात आणखी काही मोटारसायकली मिळतील असा विश्वास पोलिसांनी यावेळी व्यक्त केला आहे. जळगाव पोलिसात आरोपी आसिफ पटेल विरुद्ध गुन्हा दाखल करण्यात आलेला आहे.
