जळगाव, लोकशाही न्यूज नेटवर्क
जळगाव शहरात मध्यरात्री गोळीबाराचा थरार उडाला. शहरातील दूध फेडरेशन रस्त्यावर मध्यरात्री २ वाजेच्या सुमारास एका भरधाव चारचाकीमध्ये गोळीबार होऊन एका 25 वर्षीय तरुणाच्या पाठीत उजव्या बाजूस गोळी शरीरात घुसली असून तो जखमी झाला आहे. याप्रकरणी जळगाव शहर पोलीस स्थानकात गुन्हा दाखल करण्यात आला आहे. जळगाव जिल्ह्यात गेल्या काही दिवसांपासून अनेक गोळीबाराच्या घटना घडल्या आहेत. तसेच हे गावठी कट्टे आजकाल जणू खेळण्यातील बंदुकीसारखे झाले असून शहरात मोठ्या प्रमाणावर गुन्हेगारी वाढली आहे. यामुळे जळगाव शहरात कायदा आणि सुव्यवस्थेचा प्रश्न निर्माण झाला आहे.
नाजूम फिरोज पटेल (वय 25, रा. पाळधी ता. धरणगाव) असे जखमी तरुणाचे नाव आहे. तो गावात परिवारसह राहतो. त्याचा मित्र तौहिद कय्यूम देशपांडे (वय 23, रा. पाळधी ता.धरणगाव) आणि अजून 1 जण असे 3 जण दोघे बुधवारी दि. 14 मे रोजी भुसावळ येथे तृतीयपंथीयांचा कार्यक्रम पाहण्यासाठी गेले होते. काम आटोपून मध्यरात्री पाळधी येथे परत येत असताना त्यांनी महामार्ग टाळून जळगाव शहरात शिरले. शिवाजीनगर उड्डाणपुलावरून पाळधीला जाणार होते. दरम्यान शिवाजीनगर उड्डाणपूल ओलांडल्यावर पुढे जाताना कारमध्ये मागे बसलेल्या तौहिद देशपांडे याच्याकडील बंदुकीतून अचानक गोळी सुटल्याने पुढे बसलेल्या नाजुम पटेल यांच्या पाठीमध्ये ती घुसली.
दरम्यान नाजूम पटेल याला उपचारासाठी तातडीने शासकीय वैद्यकीय महाविद्यालय व रुग्णालयात आणण्यात आले तेथे प्रथमोपचार झाल्यावर त्याला छत्रपती संभाजीनगर येथे पुढील उपचारासाठी नातेवाईकांनी दाखल केले आहे. याप्रकरणी तौहिद देशपांडे याला स्थानिक गुन्हे अन्वेषण शाखेच्या पथकाने ताब्यात घेतले. पुढील कार्यवाहीसाठी जळगाव शहर पोलीस स्टेशनच्या ताब्यात देण्यात आले असून अटकेची कार्यवाही सुरू केली आहे.
