बेरोजगारीच्या तणावातून जळगावात तरुणाची स्वतःला पेटवून आत्महत्या
जळगाव प्रतिनिधी Iराधाकृष्ण नगरात गुरुवारी (२ ऑक्टोबर २०२५) सायंकाळी ६ वाजता बेरोजगारीच्या तणावातून सुरेंद्र रामसिंग चौधरी (वय ३३) या तरुणाने स्वतःला पेटवून घेऊन आत्महत्या केल्याची धक्कादायक घटना घडली. त्याला तातडीने रुग्णालयात दाखल केले, परंतु गंभीर जखमांमुळे रात्री ११ वाजता त्याचा मृत्यू झाला. या घटनेने शहरात हळहळ व्यक्त होत असून, बेरोजगारीच्या गंभीर समस्येकडे लक्ष वेधले गेले आहे.
मिळालेल्या माहितीनुसार, सुरेंद्र हा त्याच्या आईसोबत राधाकृष्ण नगरात राहत होता. नोकरी नसल्याने तो गेल्या काही दिवसांपासून प्रचंड मानसिक तणावात होता. घटनेच्या दिवशी दसऱ्याच्या निमित्ताने त्याची आई दुर्गोत्सवासाठी बाहेर गेली होती. यावेळी घरी एकटाच असताना सुरेंद्रने ज्वलनशील पदार्थ अंगावर ओतून स्वतःला पेटवून घेतले. आग लागल्याने तो ओरडत रस्त्यावर धावला. स्थानिक तरुणांनी तातडीने आग विझवून त्याला शासकीय वैद्यकीय महाविद्यालयात दाखल केले.
डॉक्टरांनी उपचार सुरू केले, परंतु गंभीर जखमांमुळे रात्री ११ वाजता सुरेंद्रचा मृत्यू झाला. शहर पोलीस ठाण्यात अकस्मात मृत्यूची नोंद झाली असून, पोलिस तपास करत आहेत
