जळगाव, लोकशाही न्यूज नेटवर्क
जळगाव शहरात एका तरुणाने विष प्राशन केल्याची घटना घडली होती. घरी जेवण केल्यांनतर बाहेर जाऊन विष प्राशन करून घरी आल्यावर तरुणाला अत्यवस्थ वाटू लागले. त्याच्यावर उपचार सुरु असताना त्याचा मृत्यू झाला आहे. याप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
मिळालेल्या माहितीनुसार, योगेश लीलाधर वाघोदे (वय ३२, रा. आयोध्यानगर) असे मयत तरुणाचे नाव आहे. योगेश एका कंपनीत कामाला होता. हा तरुण आई, पत्नी व मुलासह आयोध्यानगरमध्ये राहत होता. सहा महिन्यांपासून त्याची पत्नी मुलासह माहेरी गेलेली आहे. मंगळवारी या तरुणाने आईसोबत जेवण केले व नंतर तो बाहेर गेला. काही वेळाने तो घरी आला. दारात बसलेल्या आईजवळ बसला. काही वेळाने त्याला उलट्या होऊ लागल्या.
दरम्यान आईने नागरिकांच्या मदतीने त्याला शासकीय वैद्यकीय महाविद्यालय व रुग्णालयात दाखल केले. अतिदक्षता विभागात उपचार सुरु असताना मंगळवारी दि. १३ रोजी १२. ४० वाजता त्याचा मृत्यू झाला आहे. या प्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे.
