पुढे सरका म्हणताच वृद्ध महिलेचा संताप, महिला वाहकाला कडाडून घेतला चावा!
जळगाव – बसमध्ये गर्दी असताना वाहकाने “पुढे सरका” असे सांगितल्याचा राग आल्याने एका वृद्ध महिलेने महिला वाहकाच्या हाताला कडाडून चावा घेत जखमी केले. हा धक्कादायक प्रकार मंगळवारी दुपारी टॉवर चौकाजवळ घडला. याप्रकरणी शहर पोलिस ठाण्यात गुन्हा दाखल करण्यात आला आहे.
जळगाव बसस्थानकातून नरगीस खलील मनियार (वय ३६, रा. एस.टी. कॉलनी) या महिला वाहक आणि बस चालक बापू बाबुराव कोळी हे आसोदा-जळगाव (MH-14 DT-2175) या बसने संध्याकाळी ५ वाजता मार्गस्थ झाले. बसमध्ये गर्दी असल्याने वाहकाने प्रवाश्यांना पुढे सरकण्यास सांगितले. मात्र, ७० वर्षीय सुशीला शिरसाठ (रा. नांद्रा) या वृद्ध महिलेला हे बोलणे खटकले आणि त्यांनी अचानक महिला वाहकाला शिवीगाळ करत हुज्जत घालायला सुरुवात केली.
किर्तनकारालाही धमकी
बसमधील एका जेष्ठ किर्तनकार महाराजांनी प्रकरण शांत करण्याचा प्रयत्न केला, मात्र संतापलेल्या वृद्ध महिलेने त्यांनाही चप्पल उगारून शिवीगाळ केली संतापाच्या भरात वृद्ध महिलेने महिला वाहकाचा हात घट्ट धरून पिरघळला आणि पंज्यावर जोरदार चावा घेतला, ज्यामुळे वाहकाच्या हातातून रक्तस्राव सुरू झाला. या घटनेने बसमध्ये एकच गोंधळ उडाला आणि बस चालकाने थेट बस शहर पोलिस ठाण्यात नेली.
पोलिस ठाण्यात महिला वाहकाने संपूर्ण प्रकाराची माहिती दिल्यानंतर पोलिसांनी सुशीला शिरसाठ यांची चौकशी केली. शासकीय कामात अडथळा आणल्याप्रकरणी त्यांच्यावर गुन्हा दाखल करण्यात आला आहे.
