लोकशाही न्यूज नेटवर्क
अयोध्या येथील राम मंदिरात दान चोरीच्या वादाच्या पार्श्वभूमीवर राम मंदिर ट्रस्टने आपला नवीन सचिव निवडला आहे. पेशाने अभियंता आणि मंदिर बांधकामात प्रकल्प व्यवस्थापक असलेल्या जगदीश आफले यांना पहिले सचिव म्हणून नेमण्यात आले आहे. सीईओच्या नियुक्तीत विलंब होत असल्याने ट्रस्टने सचिव हे नवीन पद निर्माण केले आणि आफले यांना ही जबाबदारी सोपवली. मात्र त्यांच्या नियुक्तीवर औपचारिक शिक्का २ सप्टेंबरला मारण्यात येईल. कारण तेव्हा ट्रस्टची पुढील बैठक होणार आहे. जगदीश आफळेंचे महाराष्ट्राशी असलेल्या कनेक्शनमुळे ते सध्या चांगलेच चर्चेत आहेत.
श्रीराम जन्मभूमी तीर्थ क्षेत्र ट्रस्टच्या वतीने जगदीश आफले यांना ट्रस्टचे नवीन अधिकृत स्वाक्षरीकर्ता म्हणून नियुक्त करण्यात आले आहे. त्यांच्या नावाचा प्रस्ताव स्टेट बँक ऑफ इंडिया कडेही पाठवण्यात आला आहे. दान चोरीचा प्रकार उघडकीस आल्यानंतर हा मोठा राजकीय मुद्दा बनला होता आणि दीर्घ काळाच्या चर्चेंनंतर महासचिव चंपत राय आणि ट्रस्टी डॉ. अनिल मिश्रा यांनी राजीनामा दिला होता.
त्यानंतर ६ जुलैला ट्रस्टच्या बैठकीत तत्कालीन महासचिव चंपत आणि ट्रस्टी अनिल यांचा राजीनामा स्वीकारण्यात आला. त्यासोबतच ट्रस्टने अधिकृत स्वाक्षरीकर्त्यांमध्येही बदल करण्याचा निर्णय घेतला. त्यानुसार ट्रस्टने अंतरिम महासचिव कृष्ण मोहन आणि जगदीश आफले यांची नावे बँकेला पाठवली, मात्र आफले ट्रस्टी नसल्यामुळे बँकेने प्रश्न उपस्थित केला होता. त्यामुळे खाते संचालन अडथळ्यात सापडले होते.
पण नवीन नियुक्तीनंतर ट्रस्टतील स्वाक्षरीकर्त्याबाबतचा अडथळा आता संपला आहे. एसबीआयनेही नवीन प्रस्ताव आल्यानंतर खात्यांचे संचालन पुन्हा सुरू केले आहे. अधिकृत स्वाक्षरीकर्ता नसल्यामुळे ट्रस्टशी संबंधित सुमारे एक हजार कर्मचाऱ्यांच्या पगारावर आणि एजन्सींच्या पेमेंटवर परिणाम होत होता.
राम मंदिर बांधकामाचे प्रकल्प व्यवस्थापक राहिलेले जगदीश आफले बिना पगाराचे आपली जबाबदारी पार पाडत होते. त्यांना ट्रस्टचे पहिले सचिव बनवण्यात आले आहे. सचिवासोबतच ट्रस्टच्या प्रवक्त्याबाबत निवड प्रक्रिया सुरू आहे. यासाठी अनेक नावांवर चर्चा झाली आहे. लवकरच त्याबाबतही नाव जाहीर केले जाईल, असे मानले जात आहे.
