अखेर बदला घेतलाच ! भारताने पाकिस्तानवर केला मोठा हल्ला 

लोकशाही न्युज नेटवर्क 

पहलगाम हल्ल्याचा बदला भारताने घेतला आहे. भारतीय संरक्षण मंत्रालयाने ‘ऑपरेशन सिंदूर’ नावाने पाकिस्तानमधील दहशतवादी ठिकाणावर हवाई हल्ले केल्याची माहिती दिली आहे. पाकिस्तान तसेच पीओकेमधील 9 ठिकाणे ओळखून ती नष्ट करण्यात आली, असे भारताने म्हटले आहे. तर पाकिस्तानी लष्कराने भारतीय लष्कराने पीओकेमधील कोटली, मुझफ्फराबाद आणि बहावलपूरमध्ये हल्ले केल्याची पुष्टी केली.

जम्मू-काश्मीरच्या पहलगाममध्ये झालेल्या अतिरेकी हल्ल्यानंतर सोमवारी रात्री ‘ऑपरेशन सिंदूर’ राबवले. या गुप्त ऑपरेशन अंतर्गत भारतीय वायुसेनेने पाकिस्तान आणि पाकव्याप्त काश्मीरमधील 9 दहशतवादी तळांवर हवाई हल्ले केले.

हे हल्ले रात्री 1:30 वाजता करण्यात आले आणि यामागचा उद्देश होता, दहशतवाद्यांचे लॉंचपॅड्स आणि शस्त्रास्त्र साठ्याचा नाश करणे.

अत्याधुनिक लढाऊ

सूत्रांच्या माहितीनुसार, मिराज-2000 आणि सुखोई-30 एमकेआय सारख्या अत्याधुनिक लढाऊ विमानांनी बहावलपूर, कोटली आणि मुजफ्फराबाद येथील टार्गेट्सवर अचूक हल्ले केले. हे भाग जैश-ए-मोहम्मद आणि लश्कर-ए-तोयबा यांसारख्या दहशतवादी संघटनांचे बालेकिल्ले मानले जात होते.

एलओसीवर तोफखाना उघडला

भारतीय कारवाईनंतर पाकिस्ताननेही युद्धविरामाचा भंग करत पुंछ-राजौरी सेक्टरमधील भींबर गली भागात तोफेचा मारा केला. मात्र भारतीय लष्कराने संतुलित व चोख प्रत्युत्तर दिले असून, नियंत्रण रेषेवर सुरक्षेसाठी सगळी तयारी पूर्ण असल्याचे सैनिकी अधिकाऱ्यांनी स्पष्ट केले आहे.

भारताची वायुसेना सज्ज

रक्षा विभागाच्या अधिकाऱ्यांनी सांगितले की, भारत-पाकिस्तान सीमेवरील सर्व वायु संरक्षण यंत्रणा सज्ज ठेवण्यात आल्या आहेत. कोणतीही परिस्थिती उद्भवली तरी तातडीने प्रत्युत्तर देता येईल अशी तयारी करण्यात आली आहे.