पाचोरा, लोकशाही न्यूज नेटवर्क
मौजे कुरंगी, ता. पाचोरा येथून वाळू वाहतूक करणारा हायवा ट्रक खेडगाव नंदीचे परिसरात महसूल विभागाच्या पथकाने पकडला. वाळू वाहतुकीसंदर्भातील तपासणीदरम्यान सदर वाहन आढळून आल्याने महसूल पथकाने तात्काळ कारवाई करत हायवा ट्रक ताब्यात घेतला. पुढील कायदेशीर कार्यवाहीसाठी सदर वाहन तहसील कार्यालय, पाचोरा येथे जमा करण्यात आले आहे.
ही कारवाई पथक प्रमुख नायब तहसीलदार विनोद कुमावत यांच्या नेतृत्वाखाली करण्यात आली. कारवाईमध्ये मंडळ अधिकारी पाचोरा आर. डी. पाटील, ग्राम महसूल अधिकारी दीपक दवंगे, शिवाजी डोंगरे, लहू कोळेकर, महसूल सहायक गोपाल पाटील आणि ईश्वर पाटील यांनी सहभाग घेतला.
महसूल विभागाच्या पथकाकडून वाळूच्या अवैध उत्खनन आणि वाहतुकीवर सातत्याने लक्ष ठेवण्यात येत असून, नियमांचे उल्लंघन करणाऱ्या वाहनांवर कारवाई करण्यात येत आहे. कुरंगी येथून वाळू वाहतूक करणाऱ्या हायवा ट्रकवर करण्यात आलेल्या या कारवाईमुळे अवैध वाळू वाहतुकीला आळा घालण्यासाठी महसूल विभागाची मोहीम सुरू असल्याचे दिसून येत आहे.
सदर वाहनावरील वाळू वाहतुकीसंदर्भातील कागदपत्रांची तपासणी करून नियमानुसार पुढील कारवाई करण्यात येणार असल्याची माहिती महसूल विभागाकडून देण्यात आली.
