तापीपुलावर भीषण अपघात : डंपरच्या धडकेत आई-मुलाचा मृत्यू, वडील व दुसरा मुलगा गंभीर
जळगाव (प्रतिनिधी) : जळगाव-चोपडा मार्गावरील विदगावजवळील तापी नदीच्या पुलावर मंगळवारी रात्री साडेदहा वाजता झालेल्या भीषण अपघातात आई व मुलाचा जागीच मृत्यू झाला, तर वडील व दुसरा मुलगा गंभीर जखमी झाला. भरधाव वेगाने आलेल्या वाळूच्या डंपरने कारला जोरदार धडक दिल्याने कार थेट नदीपात्रात कोसळली.
या भीषण अपघातात मीनाक्षी नीलेश चौधरी (रा. विठ्ठल नगर) आणि त्यांचा मुलगा पार्थ (वय १२) यांचा मृत्यू झाला. तर नीलेश प्रभाकर चौधरी (वय ३६) व ध्रुव (वय ४) हे गंभीर जखमी असून त्यांच्यावर उपचार सुरू आहेत. अपघात इतका भीषण होता की क्षणभरात संपूर्ण कुटुंब उद्ध्वस्त झाले.
चौधरी कुटुंब देवीच्या दर्शनासाठी चोपडा येथे गेले होते. परतताना विदगाव येथील तापीपुलावर हा अपघात झाला. धडक इतकी जोरदार होती की कार नियंत्रण सुटून थेट नदीपात्रात कोसळली. अपघातानंतर वाळूने भरलेला डंपर पुलावर आडवा उभा राहिल्याने वाहतूकही ठप्प झाली.
शिक्षक दांपत्यावर काळाचा घाला
नीलेश चौधरी हे धानोरा शाळेत शिक्षक आहेत, तर मयत मीनाक्षी चौधरी या शिवाजीनगरमधील शाळेत शिक्षिका म्हणून कार्यरत होत्या. शिक्षकी पेशात कार्यरत असलेल्या दांपत्यावर काळाने अक्षरशः घाला घातल्याने परिसरात हळहळ व्यक्त होत आहे.
