लोकशाही न्यूज नेटवर्क
मध्य प्रदेशातील उज्जैनमधील महाकालेश्वर मंदिराच्या परिसरातील नागचंद्रेश्वर मंदिरात भाविकांची प्रचंड गर्दी झाली होती. नागपंचमीनिमित्त भाविकांनी दर्शनांसाठी मोठी गर्दी केली होती. यामुळे नागचंद्रेश्वर मंदिर,हरसिद्धी मंदिर आणि बडे गणेश मंदिर परिसरात चेंगराचेंगरीची परिस्थिती निर्माण झाली होती.
मंदिराकडे जाणाऱ्या मार्गावर भाविकांची प्रचंड गर्दी झाल्यामुळे परिस्थिती हाताबाहेर गेली. अनेकांची मोठी धक्काबुक्की झाली. या गोंधळाच्या आणि चेंगराचेंगरीसारख्या परिस्थितीत, चिरडले गेल्यामुळे तीन जण गंभीर जखमी झालेत. चेंगराचेंगरीची घटना घडल्यानंतर स्थानिक प्रशासन आणि पोलीस कर्मचारी घटनास्थळी दाखल झाले असून त्यांनी संपूर्ण परिस्थिती नियंत्रणात आणली.
सर्व जखमींना तातडीने प्रथमोपचार देण्यात आले आणि त्यानंतर पुढील उपचारांसाठी जवळच्या जिल्हा रुग्णालयात दाखल करण्यात आले. सणासुदीच्या काळात सुरक्षा आणि गर्दीच्या नियोजनाबाबत प्रशासनाकडून आता विशेष खबरदारी घेण्यात येत आहे.
भगवान नागचंद्रेश्वर यांचे पवित्र स्थान मध्य प्रदेशातील उज्जैन येथील प्रसिद्ध महाकालेश्वर ज्योतिर्लिंग मंदिर परिसराच्या तिसऱ्या मजल्यावर स्थित आहे. या मंदिराचे सर्वात मोठं वैशिष्ट्य म्हणजे या मंदिराचे दरवाजे वर्षातून केवळ एकदाच उघडले जातात. नागपंचमीच्या दिवशी पूर्ण २४ तासांसाठी मंदिराचे दरवाजे उघडले जातात. त्यावेळी दर्शनासाठी भाविकांची मोठी गर्दी होते. या दिवसाव्यतिरिक्त, उर्वरित वर्षभर हे मंदिर भाविकांसाठी बंद असते.
मंदिराच्या गर्भगृहात विराजमान असलेली ही ११ व्या शतकातील मूर्ती म्हणजे कला आणि श्रद्धा यांचा एक भव्य संगम आहे. येथे, देवाधिदेव भगवान महादेव आणि माता पार्वती हे दहा ते अकरा फणे असलेल्या एका विशाल शेषनागाच्या छायेखाली विराजमान आहेत. या मनोहारी रूपात त्यांच्यासोबतच, सर्वप्रथम पूजले जाणारे दैवत भगवान गणेशही पाहायला मिळतात. भगवान शिवाचे असे अद्वितीय रूप जगात अन्यत्र कोठेही आढळत नाही, अशी मान्यता आहे.
