लोकशाही न्यूज नेटवर्क
कर्नाटकमध्ये भीषण रस्ते अपघातामध्ये ७ जणांचा दुर्दैवी मृत्यू झाला. कर्नाटकच्या उत्तर कन्नड जिल्ह्यामध्ये ही घटना घडली. मध्यरात्री भरधाव कार आणि ट्रकची समोरासमोर धडक झाली. या अपघातामध्ये ७ जणांचा जागीच मृत्यू झाला. या अपघातामध्ये दोन जण गंभीर जखमी झाले आहेत. या अपघातानंतर महामार्गावर वाहतूक कोंडी झाली होती.
पोलिसांनी दिलेल्या माहितीनुसार, येल्लापूर पोलिस ठाण्याच्या हद्दीतील राष्ट्रीय महामार्ग- ५२ वरील अरबैल घाट परिसरात ही अपघाताची घटना घडली. मध्यरात्री १.३० वाजताच्या सुमारास हा अपघात झाला. या अपघातामध्ये सात जणांचा जागीच मृत्यू झाला तर २ जण गंभीर जखमी झाले. जखमींची प्रकृती चिंताजनक आहे. जखमींना तात्काळ उपचारासाठी रुग्णालयात दाखल करण्यात आले. हुबळी येथील केआयएमएस रुग्णालयात त्यांच्यावर उपचार सुरू आहेत.
कारमध्ये चालकासह ९ जण प्रवास करत होते. ही कार धारवाडवरून धर्मस्थळा आणि चिकमंगळूरच्या दिशेने जात होती. चालक अतिशय वेगाने आणि बेदरकारपणे कार चालवत होता. त्याचवेळी त्याची कार रस्त्याच्या दुसऱ्या मार्गिकेवर गेली. त्यावेळी अंकोलाहून येणाऱ्या ट्रकला कारने जोरदार धडक दिली. ही धडक इतकी भयंकर होती की कारचा चक्काचूर झाला. पोलिसांना कारमधून मृतदेह बाहेर काढणं देखील कठीण झाले होते.
अपघातामध्ये मृत्यू झालेले सर्वजण धारवाडचे रहिवासी होते आणि ते धर्मस्थळ आणि इतर ठिकाणी तीर्थयात्रेला गेले होते. कार चालक संजय अंगडी (३३ वर्षे), बसवराज (४८ वर्षे), अभिषेक ईश्वर (२८ वर्षे), अक्षय (२६ वर्षे), अभिषेक (२६ वर्षे) आणि मंजुनाथ चुलकी (३२ वर्षे) अशी मृतांची नावं आहेत. सर्वांचे मृतदेह शवविच्छेदनासाठी रुग्णालयात दाखल करण्यात आले आहे. या प्रकरणी जखमी तरुण शिवराजच्या तक्रारीच्या आधारे येल्लापूर पोलिसांनी गुन्हा दाखल करून पुढील तपास सुरू केला आहे.
