लोकशाही न्यूज नेटवर्क
मध्य प्रदेशातील सागर जिल्ह्यातून एक अत्यंत धक्कादायक आणि दुर्दैवी घटना समोर आली आहे. बनावट आणि विषारी दारू प्राशन केल्यामुळे अनेक जणांचा दुर्दैवी मृत्यू झाला आहे. या घटनेमुळे संपूर्ण सागर जिल्ह्यात प्रचंड खळबळ उडाली आहे. स्थानिक रहिवाशांमध्ये भीतीचे वातावरण पसरले आहे. मृतांचा आकडा आणखी वाढण्याची भीती व्यक्त केली जात आहे.
मिळालेल्या माहितीनुसार, मध्य प्रदेशमधील सागर जिल्ह्यातील काही ग्रामस्थांनी स्थानिक पातळीवर विक्री केली जाणारी दारू प्राशन केली होती. दारू पिल्यानंतर अवघ्या काही वेळातच अनेकांची तब्येत अचानक बिघडण्यास सुरुवात झाली. त्यांना उलट्या, चक्कर येणे आणि अंधारी येणे असा त्रास होऊ लागला. परिस्थिती बिघडल्याने त्यांना तातडीने जवळच्या रुग्णालयात दाखल करण्यात आले. मात्र, उपचारादरम्यान अनेक जणांची प्राणज्योत मालवली. तर काही जणांची प्रकृती अद्याप गंभीर असून त्यांच्यावर शासकीय रुग्णालयात उपचार सुरू आहेत.
या दुर्घटनेची माहिती मिळताच सागर जिल्ह्याचे वरिष्ठ पोलिस अधिकारी आणि प्रशासकीय पथक तातडीने घटनास्थळी दाखल झाले. पोलिसांनी या प्रकरणी गुन्हा दाखल केला असून विषारी दारूची विक्री करणाऱ्या अवैध अड्ड्यांवर छापे टाकण्यास सुरुवात केली आहे. दरम्यान ही बनावट दारू नक्की कुठून आली आणि ती कोणी तयार केली होती, याचा शोध पोलिस घेत आहेत. या घटनेनंतर स्थानिक नागरिकांनी तीव्र संताप व्यक्त केला असून अवैध दारू विक्री करणाऱ्यांवर कडक कारवाई करण्याची मागणी केली आहे.
