लोकशाही न्यूज नेटवर्क
राज्यात रविवारी मान्सूनपूर्व पावसाने अनेक भागांत दमदार हजेरी लावत उष्ण आणि दमट हवामानापासून नागरिकांना मोठा दिलासा दिला. मुंबई, ठाणे, नवी मुंबई, पनवेल, रायगड, रत्नागिरी तसेच विदर्भातील काही भागांत हलक्या ते मध्यम सरी कोसळल्या. काही ठिकाणी सकाळच्या सत्रात जोरदार पावसाची नोंद झाली असून वीजपुरवठा खंडित होण्याच्या घटनाही घडल्या.
हवामान विभागाने पुढील काही दिवस राज्यात मेघगर्जनेसह पावसाचा अंदाज वर्तवला आहे. पालघर, ठाणे, मुंबई, रायगड, रत्नागिरी, पुणे आणि अहिल्यानगर जिल्ह्यांसाठी यलो अलर्ट जारी करण्यात आला असून काही भागांत दुपारनंतर पावसाच्या सरी वाढण्याची शक्यता व्यक्त करण्यात आली आहे.
मध्य महाराष्ट्रात धुळे, नंदुरबार, नाशिक आणि घाट परिसरातही पावसासाठी पोषक वातावरण तयार झाले आहे. जळगावमध्ये मंगळवारपर्यंत तर पुणे आणि अहिल्यानगरमध्ये बुधवारपर्यंत पावसाचा अंदाज आहे. विदर्भातील नागपूरसह अनेक भागांत वादळी वाऱ्यासह पावसाचा इशारा देण्यात आला आहे.
दरम्यान, अरबी समुद्र आणि बंगालच्या उपसागरात मान्सूनचे वारे पुन्हा सक्रिय झाले असून मान्सूनच्या प्रगतीला वेग आला आहे. केरळमध्ये पुढील चार ते पाच दिवसांत नैऋत्य मान्सून दाखल होण्याची शक्यता वर्तवली जात आहे. त्यामुळे महाराष्ट्रातही मान्सूनच्या आगमनासाठी अनुकूल परिस्थिती निर्माण होत असल्याचे हवामान विभागाचे निरीक्षण आहे. शेतकऱ्यांमध्ये या पावसामुळे खरीप हंगामाच्या तयारीबाबत आशावाद निर्माण झाला आहे.
