लोहारा ता. पाचोरा
तालुक्यातील लोहारा-नाचनखेडा रस्त्याच्या कडेला एका बिगारी मजुराचा मृतदेह आढळून आल्याने परिसरात खळबळ उडाली आहे. गजानन जयराम जाधव (वय ५०) असे मृत मजुराचे नाव आहे. त्यांच्या मृत्यूचे नेमके कारण अद्याप स्पष्ट झालेले नसून, या घटनेबाबत विविध प्रश्न उपस्थित होत आहेत.
लोहारा येथील मगरे नामक ग्रामस्थाच्या घराचे बांधकाम सुरू असून, या कामासाठी पिंपळगाव हरेश्वर येथून एक मिस्त्री व दोन बिगारी मजूर आले होते. शनिवारी दुपारी सुमारे एक वाजण्याच्या सुमारास गजानन जाधव यांनी सोबतच्या दोघांना “शौच करून येतो” असे सांगून तेथून निघून गेले. मात्र, बराच वेळ होऊनही ते परत न आल्याने सहकाऱ्यांनी त्यांच्या भ्रमणध्वनीवर संपर्क साधण्याचा प्रयत्न केला. मात्र, फोनला प्रतिसाद मिळाला नाही. त्यानंतर दोघेही घरी परतले.
दरम्यान, लोहारा-नाचनखेडा रस्त्यावर घराकडे बैलगाडीने परतणाऱ्या भाबळा व तोतरा नामक मुलांना रस्त्याच्या कडेला गजानन जाधव हे मृतावस्थेत आढळून आले. त्यांनी याबाबत पोलिसांना माहिती दिली. माहिती मिळताच पोलीस हेडकॉन्स्टेबल तात्याबा नागरे, पोलीस कॉन्स्टेबल योगेश भिलखेडे व पोलीस कॉन्स्टेबल गोविंद वाळले यांनी घटनास्थळी धाव घेत पंचनामा केला.
मृतदेहाजवळ बिगारी कामासाठी वापरण्यात येणारी प्लास्टिकची पाटी तसेच रेती, सिमेंट मिश्रित बांधकाम साहित्य आढळून आले. पोलिसांनी मृतदेह पाचोरा ग्रामीण रुग्णालयात शवविच्छेदनासाठी पाठविला आहे. शवविच्छेदनाच्या अहवालानंतर मृत्यूचे नेमके कारण स्पष्ट होण्याची शक्यता आहे.
शौचास जाण्याचे सांगून निघालेला मजूर तब्बल दोन किलोमीटर अंतरावर कसा पोहोचला? असा प्रश्न या घटनेनंतर उपस्थित होत आहे. आज साप्ताहिक बाजार असल्याने मृतदेह आढळल्याची माहिती मिळताच घटनास्थळी ग्रामस्थांची मोठी गर्दी झाली होती. या प्रकरणाचा अधिक तपास पोलीस करीत आहेत. मयत गजानन जाधव यांच्या पश्चात वृद्ध आई-वडील, पत्नी, एक मुलगा व एक मुलगी असा परिवार आहे.
