लोकशाही न्यूज नेटवर्क
मुंबईच्या वांद्रे परिसरात अल्पवयीन मुलाला स्कूटर चालवण्यास दिल्याप्रकरणी त्याच्या वडिलांविरोधात गुन्हा दाखल करण्यात आला आहे. या कारवाईमुळे अल्पवयीन मुलांच्या हातात वाहन देणाऱ्या पालकांमध्ये खळबळ उडाली आहे.
वांद्रे पश्चिम येथील हिल रोड परिसरात १९ ऑगस्ट रोजी नाकाबंदीदरम्यान पोलिसांनी एका १७ वर्षीय मुलाला स्कूटर चालवताना अडवले. तपासणीदरम्यान त्याच्याकडे वैध वाहनचालक परवाना नसल्याचे समोर आले. चौकशी केली असता, त्याच्या वडिलांनीच स्कूटर आणि तिची चावी दिल्याचे मुलाने पोलिसांना सांगितले.
पोलिसांनी स्कूटर ताब्यात घेतली असून, आधारकार्डाच्या पडताळणीत संबंधित मुलगा अल्पवयीन असल्याचे स्पष्ट झाले. तो ज्युनियर कॉलेजमध्ये शिक्षण घेत असल्याची माहितीही समोर आली आहे. कारवाई होण्यापूर्वी त्याने जवळपास ९ किलोमीटर स्कूटर चालवली होती.
या प्रकरणी पोलीस कॉन्स्टेबल मीनाकुमारी शितोळे यांच्या तक्रारीवरून मुलाच्या वडिलांविरोधात गुन्हा दाखल करण्यात आला. पुढील तपासात स्कूटरची मालकी दुसऱ्या व्यक्तीच्या नावावर असल्याचे समोर आले. संबंधित मालकाने ही स्कूटर वापरण्यासाठी मुलाच्या वडिलांना दिल्याचे पोलिसांना सांगितले.
अल्पवयीन मुलाला वाहन चालवण्यास देणे ही गंभीर बाब असून, मोटार वाहन कायद्यानुसार पालक किंवा वाहनमालकावर कायदेशीर कारवाई होऊ शकते. दोष सिद्ध झाल्यास तीन वर्षांपर्यंत कारावासाची शिक्षा होऊ शकते. तसेच संबंधित अल्पवयीन मुलाच्या भविष्यातील वाहनचालक परवान्यावरही कायदेशीर निर्बंध लागू होऊ शकतात.
या प्रकरणात मुलाच्या वडिलांना पोलिसांनी ताब्यात घेतले होते. त्यानंतर त्यांना नोटीस बजावून सोडण्यात आले. अल्पवयीन मुलांच्या हातात दुचाकी किंवा इतर वाहने देताना पालकांनी अधिक काळजी घ्यावी, असा स्पष्ट संदेश या कारवाईतून मुंबई पोलिसांनी दिला आहे.
पालकांनी काय लक्षात ठेवावे?
- अल्पवयीन मुलाला वाहन चालवण्यासाठी देऊ नये.
- मुलाकडे वैध वाहनचालक परवाना नसल्यास वाहनाची चावी देणे टाळावे.
- वाहनमालकानेही वाहन कोण चालवत आहे, याची खात्री करणे आवश्यक आहे.
- वाहतूक नियमांचे उल्लंघन झाल्यास पालक किंवा वाहनमालकावरही कारवाई होऊ शकते.
